祥仔鬥唱讚娥姐犀利
黎耀祥、商天娥及呂慧儀等昨日出席《歡樂滿東華2010》拜神，綵排時，祥仔與娥姐騷Quali大唱經典歌曲，祥仔讚娥姐唱功了得：「佢好犀利！唱緊甄妮原Key，我終於明白點解四大唱片公司傾唔埋，因為公司想傾娥姐！」有指將會拍電影，但祥仔已作出否認，並指電視給他滿足感，對拍戲興趣不大。問到與無綫簽約？他說：「要同我經理人（太太）商量先，我哋啲藝人，永遠話唔到事。（呢個經理人抽佣好勁喎！）呢個全抽o架！TVB都有啲過我袋吖！除非有一日佢話辛苦，否則都唔會簽住，始終兩公婆有默契啲。」另外，擔任司儀的呂慧儀被問到如果有總理捐錢叫她性感會如何，她笑說：「我諗冇囉！我驚佢哋捐錢叫我着多件衫呀！」
祥仔與娥姐合唱經典歌，連擺甫士都甚為啱「Key」！
娥姐遭曾華倩「胸襲」，表情交足戲。