江若琳食風6粒鐘 慘變僵屍

江若琳（Elanne）明年將推出個人國語碟，早前她遠赴北京拍攝亞運歌曲《everyone》的國語、粵語版MV，因當地正值嚴寒，氣溫僅得3度，加上寒風凜烈，凍得十分厲害！

為切合歌曲主題製造陽光效果，Elanne所穿的衣服也不能太臃腫，故寒上加寒，她說：「嗰日真係凍得好厲害，就算停機之後，我着咗工作人員幫我預備嘅長軍褸再加羽絨，前前後後四件褸再飲埋薑茶、貼晒全身暖包都覺得好凍，拍到後期，我啲手已經開始僵硬，連塊面都麻木埋，一啲感覺都冇，流鼻水都唔知！」

蒙古包內食齋

拍攝當日，Elanne凌晨四時便開工，拍足10小時，其中站在天台唱歌的鏡頭則佔去6小時，她白白在室外食風6粒鐘，有苦自己知！導演與工作人員見到Elanne凍得如此辛苦，大感肉赤，導演曾叫她回室內休息，但因不想拖延大家的工作時間，她決定堅持到底，專業精神可嘉！拍畢MV後，Elanne重看錄影片段，覺得效果相當好，帶出溫馨的感覺，故拍得再辛苦也感值得。

今次北京之行，唱片公司老闆特別為Elanne安排了一頓很特別的北京齋菜，她說：「佢哋帶我去咗一間好特別嘅齋舖，間齋舖喺一個蒙古包裏面，餐牌又厚又長，啲食物選擇多又好有特色，最重要係好健康冇乜油，飲品仲經過研究，點樣溝啲果汁出嚟，飲咗會令人精神啲、或者皮膚靚啲，真係好特別！」