劉倩婷學詠春做Miss Fighter

去年港姐冠軍劉倩婷，履行了1年的職務後，終於有機會投入拍劇工作，剪了一頭短髮的她，希望改變形象做打女！

從參選以來，劉倩婷（Sandy）一直以長髮示人，近日終於為了新劇而剪掉秀髮，希望新髮型帶來新衝擊：「留長髮畀人太『港姐』嘅感覺，希望以後人哋認識劉倩婷，而唔係港姐冠軍！」她笑言現在的造型很像打女，為了增加接拍古裝劇、做新一代打女的機會，她正密謀拜師學詠春：「我本身有跳開舞，手腳協調OK，學功夫應該唔難！好多人驚學完詠春會變得好大隻，不過我咁瘦，學詠春反而可以練番好個骨架！」

Sandy在無綫處境喜劇《依家有喜》中扮演實習醫生，與米雪及秦沛等多位前輩級演員合作，首度拍劇的她更笑料百出：「套劇有好多場講食飯嘅戲，有次啲嘢食已經放咗喺張枱度十幾個鐘，點知我唔知係扮食，最後真係食咗！好彩冇肚痛咋！」

感激米雪提點

Sandy跟劇中演員亦已像一家人一樣，特別獲米雪不停提點，令她相當感激：「估唔到拍劇第一日，佢就叫我哋一齊飲茶，好親民呀！佢仲叫我唔好成日皺眉，因為唔好睇，佢叫我每次想皺眉嘅時候就瞪大對眼，真係好有效！」