郭晉安歐倩怡炮製兔B得咗！

郭晉安和歐倩怡（Cindy）再度成功造人！安仔昨日宣布老婆懷孕兩個月，而Cindy亦坦言不怕腹中塊肉小器。同時，無綫小生黃浩然及曹永廉均相繼宣布太太有喜！

自誕下長子郭令山後，努力造人逾兩年的郭晉安及Cindy終如願以償，昨日宣布再度有喜！信奉基督教的他們坦言不怕BB小器，即使僅懷孕兩個多月照公告天下，分享喜悅。

半夜狂食豉油撈飯

昨午四時，身穿鬆身衞衣的Cindy與母親現身法國醫院附近，並不時雙手插入衞衣袋護肚，未幾即步入一間Cafe醫肚，胃口明顯變大的她除狂吃三文治外，還選擇果汁類健康飲品養胎。飽餐一頓後，Cindy與母親到附近幼稚園湊兒子放學，未知是否得悉弟妹將出世而醋意大發，令山見媽咪即扭抱。

當記者上前恭喜時，Cindy直認懷孕兩個多月：「唔係有心講嘅！不過大家咁關心我哋先講，加上我哋信基督教，所以唔介意講出嚟！（一早計劃再生？）生多一個好啲！小朋友成長希望有個伴，我哋老咗都希望個仔負擔冇咁重，生仔生女都冇所謂，生女仲可以扮靚，但係兩個夠晒數！」

至於安仔昨日接受查小欣電台節目訪問時，亦親證明年榮升第二任老竇：「太太檢查當日，因為有工作在身，所以冇陪佢！不過得悉喜訊之後，真係開心都嚟唔切！Cindy佗呢胎好辛苦，成日嘔，好似鬧鐘咁定時定候！（預產期？）依家都未知，我會陪太太坐月，惟有盡量爭取呢個月唔使返內地拍劇。」他又踢爆老婆懷孕後口味大變，竟於深夜要求吃豉油撈飯！

麥玲玲指生女成數高

此外，堪輿學家麥玲玲表示安仔及Cindy這胎大有機會生女：「佢哋命格應該有兩仔一女。安仔肖龍，明年犯太歲，如果生兔女會旺佢多啲，加上倩怡肖羊，所以佢哋一家人相處好和睦！」