嘉玲雙喜臨門 偉仔請假陪開P

今日生日的劉嘉玲，生日前夕榮升時裝店老闆娘，老公梁朝偉專誠請假助陣，還手拖手恩愛行天橋，相信是給嘉玲最好的生日禮物。

忙為英皇電影《讓子彈飛》宣傳的劉嘉玲，昨日抽空為她代理的意大利時裝品牌Giuliano Fujiwara進行開幕剪綵，同場舉行時裝騷，邀得圈中好友杜德偉、台灣女星賈靜雯及陳國熹等行騷，但嘉玲原先表示會出現的好友李亞鵬及緋聞男友胡軍則未見蹤影。

正在趕拍《一代宗師》的偉仔特意請假撐老婆，擔任剪綵嘉賓兼陪老婆於時裝騷後手拖手上台，他不時揮手，又展現迷人笑容，成為焦點所在。嘉玲表示每年生日偉仔都必定陪她，從沒錯過，又笑言最近兩公婆已很久沒見面，故要求《一》片導演王家衛放人。活動後，偉仔隨即與王菲、李亞鵬等一班好友為嘉玲舉行生日化裝派對，談到生日願望，嘉玲希望「健康、自在」。

赴台探望連勝文

談到偉仔因拍《一》片多次受傷，嘉玲即大感心痛，並說：「佢始終唔係武打出身，好容易受傷，我當然心痛，不過佢做緊佢鍾意做嘅嘢，我一定會支持。」有傳本有意邀請曾傳緋聞的連勝文行騷，但因槍擊事件而未能成事，她說：「我都好遺憾發生呢啲事，希望佢快啲好轉，過兩日我會去台灣探佢。」

而百無禁忌的嘉玲，前日宣傳《讓》片時，大談片中的死亡戲：「呢種愛情戲，令人意猶未盡，可以死喺姜文同葛優佢兩個懷中，格外幸福，因為我係佢哋嘅影迷。」