祖兒劈酒慶功狂歡24粒鐘

《第10屆全球華語歌曲排行榜頒獎典禮》昨日舉行，容祖兒捧走4獎，在香港女歌手中先聲奪人，她自言已大個女，不計較獎項多少，並自爆為演唱會慶功玩足24小時！

容祖兒、陳奕迅（Eason）、謝安琪（Kay）、蔡卓妍、林俊傑及樂隊Mr.等昨日出席頒獎禮，Eason與Kay表現避忌，當全體歌手上台領獎時，二人中間隔着祖兒，全程零交流。內地歌手張靚穎以5個半獎成為大贏家，而祖兒則以4獎成為香港女歌手之冠，當中包括最受歡迎女歌手殊榮！

剛完成演唱會的祖兒，以紅色透視裝現身，她說：「完成咁大型嘅演唱會已經好滿足，依家拎咩獎都咁開心，心態唔同咗，會用享受嘅心情出席頒獎禮。」由於她仍聲沙沙，獻唱時被迫夾嘴形養聲：「遲啲就冇事，依家把聲好性感，我仲可以做埋男人添！」她還自爆完騷後即舉行24小時馬拉松慶功：「第1晚已經醉咗，朋友又喊又笑，我就不停跳舞，好似開騷咁。（喺微博晒英文？）有好多感情想抒發，同個舞台Say Goodbye嗰刻先知咩叫失落，睇番歌迷嘅留言好感動，喺廁所諗起都喊。」

陳奕迅自薦拍劇冧無綫

至於剛從杭州返港的Eason透露，在當地出席飲品活動時，被2萬個氣球吊起，創出健力士世界紀錄！談及被指有唱片公司以天價利誘過檔，他說：「邊個話我份約到期？不過聽到天價，我都幾開心！」對於當選最受歡迎男歌手，他笑說：「我都係鍾意拎創作獎多啲，我由96年開始已經有創作，不過有啲冇派台啫！我知終有一日我會成功o架！（攞5個獎？）好開心囉！唔通我話唔開心咩？」雖然他是四大唱片的歌手，但仍大讚無綫劇集《義海豪情》好睇，直言有拍劇衝動，更不介意剃頭！有指陳志雲正為無綫與四大唱片斡旋，他說：「我唔理得咁多，做好自己就得。」

另外，早前在上海拍劇期間，與S.H.E成員Selina一同燒傷的俞灝明，憑歌曲《擁抱》奪得金曲獎，但由於他仍在內地醫院養傷，未能親自領獎。