祖藍玩大咗微博致歉 林峯獲頒「Chok樣」獎贈興
近期人氣急升的林峯，前晚連奪官方網頁人氣大獎及「我最喜愛的電視男角色」獎，頒獎禮後即於電視城外與粉絲預祝生日，有粉絲送上一個紙製獎座時說：「林峯係『Chok樣No.1』！」認真搞笑！對於被外間質疑連奪兩獎及遭無綫自己人狂寸Chok樣，他昨日接受電話訪問時說：「據我所知，兩個獎都係投票所得，多謝觀眾投我票！（畀自己人玩Chok樣？）我唔介意，玩啫！大家都係講吓笑！」
日前李思捷於搞笑節目中惡搞林峯，惹來其粉絲不滿，有份演出的王祖藍昨日在微博向林峯的粉絲道歉，問到是否「玩大咗」而致歉？他說：「我哋3個分開度橋，好似插咗林峯3嘢咁，我同峯師兄係好朋友，今次喺微博同佢講番聲，同埋安撫佢啲粉絲！」
監製：大家都係錫佢
至於節目監製何小慧則說：「佢哋（福祿壽）都係投入節目，大家玩完就算，其實唔只節目有玩，頒獎禮都有玩啦！我都明林峯啲粉絲忠心，大家都係錫佢！（公司批先出街？）用個『批』字太嚴重，如果出面人唔講得，自己人又唔講得，創意空間會好細！」
獲粉絲送上獎座，林峯不忘整個Chok樣娛賓。
林峯與粉絲開禮炮祝捷，場面墟冚。