祖兒約定歌迷唱到60歲
樂壇天后容祖兒前晚完成第6個紅館演唱會，她自爆未出場已不捨狂喊，至於密友何韻詩再度現身撐場，情緒高漲，祖兒更與歌迷約定唱到60歲！
容祖兒12場《NOKIA JOEY YUNG Concert Number 6》演唱會前晚圓滿結束，吸引劉美君與男友、何超雲、古巨基、老闆楊受成夫婦、黃偉文及密友何韻詩捧場，再度睇騷的阿詩，興奮得不時揮動螢光棒為祖兒打氣，當祖兒獻唱《流淚眼望流淚眼》一曲時加播阿詩的《勞斯萊斯》，令全場歡呼。甫開場，祖兒已感觸落淚，她說：「呢個演唱會真係好辛苦，但係前所未有咁開心，終於最後一場，真係好唔捨得，望住個台即刻喊咗出嚟！」
全晚有不少大合唱環節，場面感人，有歌迷大讚偶像是全世界最正的女歌手，獲祖兒送上私伙結他Pick，祖兒說：「你幫我好好保管住先！」豈料對方說：「好呀！60歲紅館見！」祖兒即感動答應，場面溫馨！最後演唱會在三度安歌下畫上完美句號。
頒獎禮後「流浪」兩月
慶功宴上，祖兒透露將會巡迴演出，暫時無意舉行Part 2，她笑言自己非常感性，未出場已爆喊，更自爆日前在台上跳爆衫：「要啲Dressers上台整咗3次，最後索性用牛皮膠紙黐住我個背脊！」唱到聲沙沙的她，直言最後一場豁出去喪唱，然後放假到外地享受陽光與海灘，她笑言不怕被偷拍：「冇所謂，我驚影咗以為係男人咋！」另外，祖兒透露明年會獨自「流浪」兩個月：「完晒頒獎禮就會走，係咪型先？」
祖兒情緒高漲，與歌迷約定60歲繼續在紅館開騷。
祖兒施展渾身解數勁歌熱舞。
完成12場個唱，祖兒當堂飲得杯落。
祖兒、吳雨、樂易玲及工作人員齊齊開香檳慶祝個唱成功。
何超雲及何韻詩到場睇騷，阿詩不時拿起相機為祖兒拍照。
古巨基陪同楊受成夫婦睇騷。