MC Jin玩神秘收埋女友

年僅28歲的MC Jin（歐陽靖）大計多多，有意兩年後和圈外女友結婚，不過卻要為女友保持神秘感！

歐陽靖早前約滿環球唱片公司，沒有「後台」的他曾擔心影響工作量，故計劃與現任的美國經理人於香港開設經理人公司，他興奮地說：「應該出年可以開得成，公司名已經諗好叫CATCH，嚟緊我哋會有正式公布，但時間仲未定。」MC Jin還計劃簽一位男新人，他說：「個男仔英文名叫KT（Kelvin Tong）呢兩年佢跟住我四圍Rap，吸收咗好多舞台經驗，明年會正式出道！」

MC Jin否認要栽培KT成為「MC Jin第二」，他說：「呢個世界冇可能有一個人可以同我一樣，但我睇住佢由零開始接觸Rap，好肯定佢係一個好有才華嘅歌手，好有信心大家會鍾意佢！」工作以外，他計劃30歲前跟拍拖多年的圈外女友結婚，不過始終不肯透露女友的背景，他說：「我同佢喺美國識，但因為佢係圈外人，佢唔想我講咁多佢，我要尊重佢，只可以講咁多！」

推出廣東碟冧歌迷

此外，MC Jin未來一年會推出一張英文及廣東碟，並透露早於08、09年間已寫好一首叫《回鄉靖》的廣東歌，他說：「有歌迷覺得我Rap英文好勁，但又唔知我噏乜，好矛盾，所以寫番首廣東歌畀大家聽！」