Kary力證與Stephy友情未變

入行近8年的型格女歌手吳雨霏（Kary），明年首度踏足紅館開騷，被指搶了Cookies舊隊友鄧麗欣的頭啖湯之餘，更被封為「金牌大風一姐」，但Kary強調從沒爭做一姐，亦無互鬥之心。

吳雨霏出道至今曾經過Cookies、樂隊Ping Pung年代，又試過以單飛姿態出碟，今年又與另一樂隊Hardpack合作，認真「百搭」，但令外界覺得她的定位欠清晰，Kary另有一番見解：「我從冇擔心過，亦冇試過擺脫，我知道冇可能抹得甩，依家朝住Rock嘅方向，希望個唱後定位更加清晰。」

前年Kary曾在Star Hall舉行音樂會，明年1月底便踏上紅館舞台開騷，她說：「上次做騷都仲係好幼嫩，依家已經大個咗好多，同時亦學咗好多嘢。」對於爬了好姊妹鄧麗欣頭，因而被封為「金牌大風一姐」，Kary反應甚大：「嘩！叫霏妹好啲，我哋路線唔同，佢花多咗時間喺電影，唔可以話超越，好相信公司決定。（影響姊妹情？）No啦﹗佢好戥我開心，冇話邊個先邊個後，就算佢開騷，我都戥佢開心，唔係話要鬥乜。」至於是否爭奪一姐位？她說：「從來冇爭過，我唔渴求呢啲嘢，識我嘅人都知。」

邀Cookies隊友睇騷

Kary明年誓要Rock爆紅館，又表示歌衫不一定性感為主，反而會有誇張和大膽的設計，至於會否邀請Cookies的其他成員捧場？她說：「會呀！唔人齊都冇所謂，佢哋都戥我開心。」問到男友有否支持？她甜笑說：「都會支持。（聖誕冇時間陪佢？）唔會詐型。（家人支持？）梗係會。」