馬浚偉開齋等奇迹 雯女呢世都唔會換獎

麥長青（麥包）、馬浚偉及苟芸慧等昨日出席劇集《紫禁驚雷》拜神，曾於06年憑《鐵血保鏢》勇奪「我最喜愛的電視男角色」的馬浚偉，今年再憑《蒲松齡》角逐「最佳男主角」，雖然勁敵林峯最近四面受敵，但他仍不敢奢望開齋稱帝：「如果要攞獎真係等奇迹！我只有一個心願，就係麥包攞『最佳男配角』，一個咁食屎嘅『非凡哥』都咁受歡迎，今次食屎都食得抵！」將有兩套劇在年初播出的他，不諱言在明年的頒獎禮較輸蝕：「今年初嘅《老友狗狗》都打入五大收視，唔係好抵！好似《蒲松齡》收視咁好，又用嚟打世界盃，我咁多年嚟好多劇都係用嚟打仗！」對於有指鄧萃雯簽約換獎，他說：「我覺得點會咁蠢！呢個時候去簽約只會惹人猜疑！」

麥包感激發哥支持

至於獲影帝周潤發點名力讚的麥包坦言深感榮幸：「原來唔只係個天睇住我哋點做人，發哥都睇住我哋點做人！」

此外，對於被指簽約換獎，雯女說：「我希望有個公平、公正嘅世界，會言行一致咁去支持呢個理念，睇到有啲頒獎禮以約換獎或者以出席得獎，咁樣個獎項就失去咗意義，所以我永遠唔會做咁嘅事，呢一世都唔會！」而勁敵佘詩曼亦直斥純屬炒作：「我覺得冇呢回事，咁樣講對當事人唔公平，大家都用心、努力咁做出成績，話以約換獎係抹殺咗演員嘅心機！」