君如家輝蝸居床戰冇得嗌
影后吳君如與影帝梁家輝在新片《我愛HK開心萬歲》中飾演夫妻「吳順」及「順嫂」，原是「闊太」的君如因破產而蝸居在老爺馮淬帆的公屋。她自爆早前與家輝在家中拍攝一場親熱戲：「嗰幕講我哋喺板間房行埋，又唔可以畀小朋友聽到聲！現實中未試過！（你屋企大又隔聲？）哈哈！私人嘢唔講喇！」席間，曾志偉笑言君如終於「深明大義、棄暗投明」，她對此說：「佢咁講但我唔可以咁講！黃老闆都搵我拍咗好多年賀歲片！（同劉嘉玲、張栢芝打對台？）冇得比，論樣貌、身材我都最靚，個個都咁講！」
此外，有份演出的鄭欣宜透露，得悉父親鄭少秋（秋官）從高處墮下受傷送院後，已第一時間致電問候：「佢叫我唔使擔心！但佢始終唔係20歲，我擔心佢會夾硬負傷再開工！」而秋官昨日前往看專科醫生，並接受頸部治療，據知他今日會如常開工。
志偉（左起）作狀掀開君如上衣，身旁的家輝邊笑邊(目及)。
君如（右）與老友娥姐喜相逢，看來拍攝空檔唔愁「悶死」。
欣宜擔心父親的傷勢，希望他多休息。