林峯腹背受敵視帝勢危

望穿秋水等做視帝的林峯，本以為今年可憑《談情說案》一償夙願，惟風頭近日被黎耀祥及陳豪壓過，視帝夢隨時撻Q！電影票房失利的他，更慘遭曾志偉「加多腳」，揚言賀歲片只預留市井角色給對方，並着他從低做起，句句有骨！

憑年中播出的《談情說案》「Professor King」一角冧死女的林峯，氣勢曾一時無兩，原以為角色能成為首奪視帝的重要籌碼，可惜《巾幗梟雄之義海豪情》及《公主嫁到》收視屢創高峰，帶挈「劉醒」黎耀祥及「金多祿」陳豪的奪獎呼聲飆升，令視帝之爭比鄧萃雯和佘詩曼的視后激鬥來得更不明朗。

寸爆齋留巿井角色

視帝夢勢危的林峯，早前電影票房失利，連邵氏製作總監黃家禧亦曾酒後吐真言寸他「未夠班」！至於邵氏賀歲片《我愛HK開心萬歲》監製曾志偉，昨日出席新片開鏡拜神時亦「加多腳」，不但揚言新片只剩下市井之徒的角色給對方，連其名字亦被剔出演員名單。被問到為何不見林峯影蹤時，志偉說：「未定住，分分鐘佢會飛返嚟客串！不過仲有12日拍，飛唔飛到返嚟都未知！（擔心林峯拖累票房？）唔會咁！每個人都有佢票房，佢係年輕人偶像嘛！（有咩角色啱佢？）我哋冇有錢仔角色，佢可以做吓爛仔，或者低下階層角色，可以從低做起！」

樂易玲出口護愛將

曾志偉句句有骨，同場的樂易玲即不禁出口護愛將，澄清林峯因檔期問題而迄今未能加入劇組：「如果佢度到期一定會拍！佢嘅工作安排到明年8月，忙完兩套戲同演唱會，之後就要返TVB開劇，佢冇優惠出去搵錢！」並力撐票房失利非愛將一個人的責任。至於曾寸爆林峯的黃家禧則明顯收斂不少：「《我》片一定有佢份！（佢孭唔起票房？）唔可以咁講，我從來冇話佢唔好！《72家租客》都冇事，唔好將佢放大！」對於被指因酒後失言而被「燉冬菇」，他沒有正面回答，身旁的曾醒明則強調他仍是邵氏製作總監。此外，視帝頂頭大熱黎耀祥坦言對獎項抱平常心，因劇集受歡迎已等於勝利，故當晚得獎與否都會跟太太下廚慶祝一番！