老公張晉宣布喜訊蔡少芬有咗

與張晉結婚多年的蔡少芬向來恨生BB，終於得償所願！張晉昨日自爆與太太成功造人等生兔BB，恭喜恭喜！

結婚多年的蔡少芬（Ada）一直未有所出，老公張晉昨日終帶來好消息！他出席福音電影《流浪漢世界盃》慶功宴時宣布與太太成功造人，愛情結晶將明年出世：「我都係知咗冇耐，詳情你哋要問番Ada。（想生仔定女？）冇所謂，最緊要健康！（香港分娩？）應該係！」

Ada現時仍身在內地拍新劇《後宮甄環傳》，張晉笑言她像重點保護的熊貓，現時由四人增至五人貼身服侍：「依家有專人煮嘢畀佢食，我諗農曆年前會拍完，到時應該唔會接Job。（特別呵護太太？）佢脾氣本來已經唔細，依家仲要加以忍耐！（有冇獎勵？）佢已經有好多獎勵，又聖誕節又情人節，我覺得佢要獎勵我至真。（Ada有冇成日嘔？）有呀！畀人話佢胃氣漲添！生BB真係又驚又喜，每個過程都好緊張，依家佢Kick一Kick我都會好擔心，總之要好小心身體。」他坦言現時更加倍努力搵奶粉錢。其後，張晉急不及待在微博分享喜悅：「在下的內人有喜了，我們都很高興，很感激各江湖朋友的關心和祝福。」Ada也在微博恭喜張晉「內子有喜」，大耍花槍。

記者昨日聯絡Ada，她透過經理人回應：「佢唔回應，一切交畀一家之主回應同處理，多謝關心！」Ada好友韓馬利則表示已知道懷孕一事，問到是否已懷胎三個月？她說：「佢超過三個月！好正常冇嘔。（拍古裝辛苦？）放心，佢做王后坐喺度指揮之嘛！（知道BB性別？）冇講，應該未照。（知佢鍾意仔定女？）仔女都鍾意。」她還表示Ada快將拍畢回港，但不會北上探班。

微博留言露玄機

其實Ada月前已於微博上透露懷孕玄機，當時她上載一張抱着BB的相片跟Fans笑說：「說個秘密你們知吧，我有咗BB。」引來不少人回應，其後她在留言開玩笑說：「是我錯了，記得不要告訴張生，一定家變，竟然有咁大個女，又不是他的DNA，我死得。」想不到一個月後變成事實！