Kay E神嫂鬥戲破冰

曾與陳奕迅（Eason）傳緋聞的謝安琪（Kay），前晚與「E神嫂」徐濠縈出席活動，兩人同場不但未有芥蒂，還密斟互笠高帽，在人前交足戲！

陳奕迅去年擔任謝安琪演唱會嘉賓，兩人在台上調情兼陶醉共舞，場面旖旎，因而爆出緋聞。前晚Kay與「E神嫂」徐濠縈出席頒獎活動，兩人在台下分開坐，但在台上則並肩而站兼雞啄唔斷，表情多多，狀甚友好，惟阿徐抱恙在身，聲線沙啞，未有受訪便匆匆離開。被問到可曾與阿徐見過面？Kay說：「梗有啦！又問呢啲？佢感冒失咗聲，我叫佢小心。」問到可與阿徐做朋友？她表示一直都沒有機會和阿徐交談，只曾在活動或後台見過面，並大讚阿徐有型有款！

「大家都係受害者」

問到早前和Eason的緋聞，會否令她和阿徐產生隔膜？Kay強調：「梗係冇啦！大家都明白係新聞炒作，我哋好無奈被寫，所以分外有親切感，大家都係受害者，佢好堅強，仲鼓勵我同Louis（老公張繼聰），佢話唔係真，（緋聞）好快就過去。」

阿徐昨日接受本報電話訪問時解釋前晚提早離場的原因：「因為未病好，加上約咗朋友食飯，所以走先。」

問到與Kay首次同台交談？她說：「哎吔！之前喺後台見過、睇騷見過啦！唔好問我呢啲嘢，我唔答o架！（同Kay做朋友？）唔可以話係老友，但大家都係識。（為之前緋聞有芥蒂？）哎吔！仲提？唔講呀！（台上傾乜？）傾幾句之嘛！全部無聊嘢，我同Kay講，話上星期見到你老公（Louis），但完全認唔到佢，瘦咗同換咗髮型，Kay答我話佢老公食齋。（傾扮靚？）冇時間呀！」阿徐再三強調：「哎吔！唔好亂寫呀，我哋冇嘢o架！唔好寫到好似有嘢！」