官恩娜篤爆港台講大話

「四台聯頒音樂大獎」決定暫停1年後，港台與新城的關係勢成水火，新城狂轟港台「彈弓手」出蠱惑，而港台則反寸新城派獎分豬肉，互不相讓！

官恩娜、連詩雅及關楚耀等，昨日偕多位樂壇新人出席《十大中文金曲頒獎禮》拉票活動，大會總監馮偉棠宣布頒獎禮定於明年1月7日在香港科學園舉行，對於新城知訊台台長朱明銳轟港台先廢後設「傳媒大獎」蠱蠱惑惑，馮偉棠澄清獎項應為「傳媒推薦大獎」，似刻意加插「推薦」二字避嫌！

寸新城分豬肉

馮偉棠說：「我哋唔想同佢嗌交，我哋冇出蠱惑，傳媒大獎1994年已經有，只係評選機制唔同！」除無綫拒參與外，他表示逾40個傳媒單位將參與投票，包括早前聲稱不會參與的新城電台，他還暗寸新城不時增加獎項數目，以致人人有獎攞欠公道，但朱明銳其後透過電話說：「黐線！我冇收過通知、冇簽過亦唔會參加投票！」

談及改期一事，馮偉棠堅稱從未講過頒獎禮於平安夜舉行，但官恩娜受訪時卻表示港台預留了她的平安夜檔期，間接踢爆港台講大話！問到會否影響接騷，官恩娜說：「身為歌手一定尊重同參加頒獎禮，之前有個商場騷因為撞期而推咗，搞到個客勁嬲，我都覺得唔好意思！」至於被本報拍得與型男同居煮飯仔的連詩雅，澄清對方只是公司的模特兒。