孫耀威上海過關受辱 Madam(逗)要害

孫耀威（Eric）透露曾多次遭海關人員「侵犯」私處，先後被男、女關員「重擊」要害，男的有心侮辱、女的有意抽水！

昨日孫耀威到新城電台接受訪問時，談及劉若英投訴遭海關人員觸摸身體重要部位，他無奈地說：「我好同情佢，因為我都試過無數咁多次。」他表示最嬲一次是在歐洲的機場，當時他順口跟海關人員說一句：「小心啲，我隻錶係新嘅！」不料觸怒該男關員，結果被「請」入房搜身，更要剝剩底褲：「我全身任何一處都畀佢揸過，最後仲一嘢揸落我要害，我覺得佢玩嘢、侮辱我，佢用英語同我講：『貴錶呀！』我好嬲！」

而兩周前Eric在上海機場，被女海關人員摸他的身體，他說：「佢一嘢『逗』落我嗰度（下體），唔係摸，我覺得佢有心囉！（有被博懵感覺？）有呀！佢知我係藝人，點解唔搵男人搜我身？係個女人搜。」他又試過被關員亂摷行李，他說：「摷到底褲，佢哋好開心。」

維護女友不惜動粗

Eric強調明白安檢的重要，但認為應顧及遊客感受，覺得有關方面需立法保障人權，他炮轟：「我覺得嗰一刻，喺海關，關員係大晒囉！」問到若目睹女友陳美詩遭摸「敏感位置」會如何處理？他說：「我一定打佢。」