聖誕被強制留港 大肚嘉欣上圍Big爆呻唔慣
靚太李嘉欣昨晚穿上度身訂造的Vera Wang晚裝、腳踏三吋高踭鞋，出席全港最高戶外聖誕樹亮燈儀式，因懷孕而肥了逾10磅的她大呻聖誕被強制留港：「好多個月冇飛，媽咪唔畀！佢話『你哋唔飛幾個月有乜問題，如果我個孫有乜事，你賠番畀我，你會後悔！』嚇到老公唔敢飛！（老公許晉亨係咪好怕外母？）唔係怕，係尊重！」腹大便便的她，工作依然不斷：「我推咗好多內地Job，但香港反而多咗，價錢仲好高！（酬勞三級跳？）係身形三級跳！腰唔係好肥，上圍反而太誇張！我都唔慣！對比以前真係太大，我鍾意冇同細啲！（老公呢？）老公叫我不停生！（鍾意你依家嘅身形，先叫你繼續生？）因為有咗個人好健康，脾氣好！不過我冇睬佢！」
君如變香港Icon
此外，席間播出由陳可辛監製、香港旅發局大使吳君如及古天樂為當局拍攝的宣傳短片，君如以「神奇俠女」造型拍攝，老公陳可辛笑說：「所以以後遊客嚟香港唔止可以見到成龍！」古仔則透露聖誕會留港，希望與家人食聖誕大餐：「已兩、三個聖誕冇同屋企人食過飯。（幾多年單身過聖誕？）好多年啦！」
李嘉欣笑言上圍「Big得太緊」，令她吃不消。
李嘉欣獲贈金兔，預祝她生個靚兔B。
陳可辛（右）難得與老婆吳君如同台，古仔竟斗膽做「攝石人」。