雯女度期返港推Job爭視后

雯女度期返港推Job爭視后

視后大熱鄧萃雯昨晚出席劇集大結局播映活動,對收視信心十足的她突然鄭九妹上身,揚言為劇集不惜推掉搵銀機會,損失不計其數。

無綫昨晚特別於電視城舉行《天晴豪情熱滿城》活動,招待五百名現場觀眾及《巾幗梟雄之義海豪情》及《天天天晴》演員收看大結局。鄧萃雯、黎耀祥、陳法拉、黃浩然與謝雪心等《義海》演員傾巢而出,剛復職不久的總經理陳志雲亦有出席打氣,並與雯女打招呼。

估計入硬最後五強

對於收視及封視后,雯女信心十足地說:「今晚特登度期返香港出席,其實每次宣傳都係特登度期,推咗好多搵錢Job,但冇計蝕幾多,我覺得值嘅!(無綫為《義海》造勢鋪路攞獎?)唔覺!呢個係台慶劇,一早話咗結局一齊睇,但若然真係都唔錯。(趁機拉票?)唔使!有睇《義海》就自然會投票。(有信心收視贏《大長今》?)一定要贏!若果唔贏都會接受現實嘅,將『鄭九妹』三個字倒轉寫,我係話『鄭九妹』啫!」

有指向視后另一大熱佘詩曼下戰書,雯女表示不知情:「係傳媒講啫!頒獎禮當晚我度咗期返嚟,因為估計入五強。呢個係香港電視行業盛會,出席係表示支持,內地演員同工作人員都好關心呢個頒獎禮。(頭先同高層拉票?)我有同陳志雲打招呼,因為好耐冇見。」

視帝大熱黎耀祥則表示有傷在身:「尋晚(前晚)拍賀歲片《我愛香港》時隻腳突然『啪』一聲,左小腿屈唔到大角度,志偉話係小腿肌肉撕裂,休息兩星期就會好番。(有信心攞視帝?)有!但都要睇收視成績,收視好機會先大。《義海》喺無綫網站有過百萬點擊,我發現好多人都關注個劇,好有信心收視好。」祥仔昨午亦到藍灣廣場出席《菲一般聖誕揭幕儀式》,談到「柴九」與「劉醒」那個角色為他帶來更多搵銀機會,他說:「好難比較,《巾幗梟雄》舊年已經播完,《義海豪情》可能要出年至見到成效。」

觀眾睇到不適送院

至於陳法拉被問到會否叫「奶奶」捧場睇《義海》,她說:「我叫晒身邊人捧場,今年我有份角逐女主角同女配角,雖然攞過女配角,但我好鍾意《義海》個角色,係我演藝生涯嘅轉捩點,希望獲得認同,但勁敵好多,心姐同胡定欣都好強!」此外,昨晚有一名中年婦女在《義海》播放期間感不適,由救傷車送院。

影視組

鄧萃雯改變初衷,度期抽空出席台慶頒獎禮爭獎!

晴晴死在楊陽懷中,結局淒美。(電視圖片)

陳法拉希望憑「晴晴」一角,再嘗奪女配角滋味。

黎耀祥兩套劇集同時播結局,有幸左擁雯女右翹毛毛。

祥仔(中)先到商場造勢,同場還有信和集團商場推廣總經理蘇蔡潔蓮女士。

陳志雲高調到場打氣,雯女還與他握手。