栢芝聖誕冇得陪仔勁心噏

張栢芝前晚通宵拍戲後，昨日仍精神奕奕出席又一城的「救助兒童會」《織善冷帽》慈善義賣日2010，為慈善不遺餘力。一身便服的栢芝在台上說：「我由18歲出道到依家30歲，生咗兩個好得意嘅BB，自覺好開心同好幸運！經歷咗咁多事，上天對我好厚待、好優待我，我想幫助多啲有需要嘅人，幾辛苦我都會抽時間做慈善工作，幫人係我一向嘅目標！」

趁後生圓夢

栢芝更暢談近月「復出」拍戲，每日拍足20多小時，身體疲累但心靈卻開心，因回家後有愛兒歡迎：「我寧願犧牲瞓覺嘅時間，都要陪仔女！」將到內蒙拍戲的她坦言，擔心當地嚴寒天氣：「我依家震騰騰，早兩日聽到內蒙受30年嚟最大風雪襲擊，所以好擔心！聖誕會喺內蒙過，有少少心噏，唔可以陪老公同仔女，不過唔緊要，拍完戲我就會全情投入番佢哋身邊！」

栢芝表示大仔Lucas要返學，細仔Quintus則未懂得認人：「我覺得趁後生，應該做自己鍾意嘅事！我最大興趣就係拍戲，當囝囝再大個啲，我會全身重返媽咪嘅角色！」另外，有工作人員上載栢芝拍戲時替收音師拿咪的相片，原來她體諒工作人員10日沒睡，即義務為大家減輕工作量。