吳浩康醋爆隊酒怒飛莊思敏

拍拖4年多的吳浩康與莊思敏一直甜蜜恩愛，不過女友隆胸後戀情出現暗湧，二人日前出席好友婚宴時，吳浩康懷疑有第三者而打爛醋埕，凌晨在微博發表分手宣言！

吳浩康（Deep）與莊思敏（Jacquelin）拍拖4年，感情無風無浪，當年有傳Jacquelin曾與過氣情敵胡定欣在電梯內爭風呷醋，Deep亦極力維護，加上年初睇孖裝戒指而盛傳好事近，足證情比金堅！不過，近日戀情卻出現暗湧，Deep對女友在8月初接受隆胸手術略有微言，惟因尊重對方而接受，戀情回復平靜，前日更雙雙出席蕭定一婚禮，豈料昨日戀情急轉直下！

微博隔空開火

Deep昨日凌晨1時在微博發表分手宣言：「和她到了分手這一刻，狗公們滿意了吧？」疑似被第三者介入，引來樂壇新人吳若希及網民追問，Deep火速刪除留言，昨晨仍如期跑馬拉松，但期間不時分心更新微博：「完成了我人生第四次半馬拉松，亦是最辛苦的一次。因為昨晚幾沒睡過，而且又發生了很不開心的事，讓我身心都很累！」鍾舒漫亦指看到他的倦容。不過Jacquelin竟在微博怒斥寫道：「最討厭喝完酒會躁狂的人，自我控制能力那麼低，酒精遲早害死你！」二人感情凍過水！

事後本報記者致電Jacquelin，她雖表示不欲多談，不過句句有骨：「件事有啲多餘！（同Deep點？）冇特別！（和好？）基本上可以咁講，冇分手！（佢喺微博暗指有第三者？）唔涉及第三者，涉及酒精，係佢飲醉咗，唔係有追求者，我都想有！（同佢OK？）本來OK，但飲酒後唔OK，佢喺唔清醒嘅狀態下寫微博，喺蕭定一婚禮度飲多咗，冇任何事發生，唔信可以問現場賓客，我哋冇嗌交！」她坦言曾勸男友少飲酒：「勸同聽係兩件事！」

認一時火遮眼

至於Deep亦指鬧分手只是一時意氣，強調事件與酒精無關：「我今朝04（昨晨4時）跑馬拉松，唔會飲醉，不過我認喺婚禮有飲過！（事情係點？）當晚我同朋友吹水，突然急尿去廁所，見到Jacquelin同個男人傾偈，個男人仲指住我話：『睇吓佢做乜啦！佢唔掂喎！』我以為佢話我，我一時火遮眼，咪同Jacquelin嘈咗幾句囉！（急刪微博留言？）冇事就刪，引起誤會唔好意思！」他表示大半年來為打拳、跑步及「不在朋友前失禮」而控制飲酒，但承認飲宴令他心散，故比賽成績欠佳。他其後上載與女友扮鬼臉合照，以證雨過天青。