陳法拉恨30歲生仔暗示秘婚
近期憑劇集《巾幗梟雄之義海豪情》中「晴晴」一角人氣急升的陳法拉，將有機會與「九姑娘」鄧萃雯爭視后，未知是否心情靚爆，昨日終忍不住口暗示已嫁入薛家，更明言與奶奶關係愈來愈好，又拍心口計劃30歲生BB！
採：名人組 文：專案組
現年28歲的陳法拉一直被指與Neway大少薛世恒已婚，可是法拉的事業如日方中，加上薛家向來低調，對於薛家大少奶的身份，法拉惟有採取迴避政策，一直避而不談。不過，最近盛傳法拉因沒有兌現生BB承諾，激到「奶奶」紮紮跳，為免再惹誤會，法拉昨日出席時裝活動時暗示自己已婚的秘密。
陳：陳法拉 記：記者
記：有指你同男友應承奶奶兩年內生BB，唔兌現承諾而激嬲奶奶？
陳：（面色一沉）太天馬行空喇！我唔知點解會有呢啲傳聞，最唔好意思係影到佢（奶奶），因為我係公眾人物，所以影響到身邊人。
記：同男朋友有冇生育計劃？
陳：我諗遲啲先，咁講有少少唔公平。
記：咁幾歲同男朋友生BB？
陳：（甜笑）我諗30歲啦！不過呢啲冇得Plan！
記：係咪因為想過二人世界？
陳：都係以工作行先！
記：其實你係咪激嬲咗奶奶？
陳：我哋關係仲好過以前。
記：佢真係你奶奶？
陳：唔……咁要問番佢喎！
適當時候公開關係
記：點解要問佢？
陳：（欲言又止）總之喺適當時候、大家有共識先公開，出面人哋點寫我唔理，佢畀人影到之後都即打番畀我，佢都有少少嚇親，但都有問候我。解釋畀佢聽之後就再冇誤會，咁仲好！不過我真係唔知出面啲人有乜用心咁寫。
記：奶奶有冇叫你唔好做？
陳：唔會，我開心係身邊嘅人支持我嘅工作。
記：同TVB會唔會續約？
陳：公司嘢唔方便講。
聖誕節出埠旅行
記：聖誕節有冇假放？會唔會出埠？
陳：應該有幾日！都會去旅行，因為香港嘅地方都去晒！
記：同老公去？
陳：唔會答你！
記：咁會唔會同男友去？
陳：依家仲未知。
記：《義海豪情》大結局會同男友一齊睇？
陳：應該唔會，因為有特別安排大結局活動。
記：對結局有冇期望？
陳：其實收視冇想像中咁高，但個結局真係好好睇，希望觀眾乖乖哋返屋企啦！我最想係可以衝破《大長今》嘅紀錄。
此外，馬詩慧、琦琦及余安安亦有份出席活動，琦琦表示聖誕節適逢是囡囡生日，故她會捉埋老公任達華去旅行：「旅行嘅事有囡囡決定，佢話最想同爸爸過，我命令咗爸爸請假喇！」而余安安表示希望拍喜劇。
一直拒提婚訊的法拉，昨日突然暗示已嫁入薛家。
法拉與Neway大少薛世恒相戀四年，感情生活甚為低調。資料圖片
馬詩慧（左起）、余安安、琦琦、周倩圯（右起）與法拉齊齊出席時裝活動。
