「男仔頭」陳茵媺激發恨嫁心

★演藝篇★挑戰自己恨演奸角

陳茵媺經常飾演性格剛烈、異常獨立的角色，但剝掉「男仔頭」外殼，原來她也有一顆「女人心」，希望結婚生仔！

港姐出身的陳茵媺（Aimee），去年在台慶頒獎禮中勇奪「飛躍進步女藝員」，把事業推上高峰，她坦言當時抱平常心，沒有想過會奪獎，但知道奪獎後卻大感驚訝，才忍不住淚如雨下！今年她有幸入圍「最佳女配角」最後十強，她說：「真係好開心，希望每年都可以有份提名！但我唔會諗太多攞獎，諗得多只會帶嚟壓力，入行三年我仲有好多嘢要學，攞『視后』對我嚟講更加係遙不可及！」

除了電視劇，Aimee亦想拍電影，她十分欣賞張曼玉：「佢同我都係香港小姐出身，最後仲衝出公仔箱去外國拍電影，我非常憧憬！其實之前有套電影傾緊，不過因為時間配合唔到推咗，不過對我嚟講，有人有興趣用我已經算係一種鼓勵啦！」

經常演正派角色的Aimee，希望將來可挑戰自己，嘗試飾演不同角色，特別是奸角或精神病人：「真係好想演奸角，亦唔怕會因為咁被觀眾討厭，因為演員只係演繹角色，觀眾會識得分辨！我好欣賞已經逝世嘅荷里活影星希夫烈格喺電影《蝙蝠俠－黑夜之神》中嘅小丑角色，佢伸脷時嘅表情簡直令人毛骨悚然！另外，《巾幗梟雄之義海豪情》入面嘅鄧萃雯奸得嚟都好有型。」

★愛情篇★緣分未到繼續追尋

入行多年，Aimee鮮有緋聞，在觀眾印象中最深刻的應是與黃宗澤的一段情，他們在劇集《烈火雄心3》中飾演「兩公婆」，深情的演繹令人有所揣測，她說：「咁就證明大家拍劇有火花，某程度都算係一件好事！」但Aimee強調根本沒有時間拍拖，「返工」就是她的老公：「身邊當然有追求者，但依家有時間我都寧願用嚟瞓覺！」

至於擇偶條件，Aimee認為首要必須孝順：「最重要我父母鍾意，因為拍拖唔係兩個人嘅事，我嘅愛情絕非用錢衡量，不過正如好多傳統保守嘅女仔一樣，我都希望男友最少能負擔到佢嘅生活！」但一切都要講求緣分，並非「想有就有」。

由08年開始演戲至今，Aimee認為毛姐算是影響她最深的演員：「佢性格爽朗，好有型！而毛姐喺現實生活中都有一個幸福家庭，我好欣賞佢事業同家庭都咁成功，每次講起囡囡同老公，佢對眼都閃閃發光，我希望有日自己講起家人，都可以好似佢一樣咁雙眼發亮，幸福洋溢！」除了想生兒育女外，她亦想領養，應該會選擇領養內地孤兒，因為內地的孤兒比印度還要多！

★親情篇★父親激發演戲細胞

Aimee的父母和弟弟都在加拿大定居，因工作繁忙，現在她已很少時間回去探親，有時父母會回港探望她，但弟弟則很少來：「不過我同細佬嘅關係愈嚟愈好，每日都會傳短訊，依家感覺就好似朋友一樣，佢知道我好鍾意演戲，知道我喺香港搵到自己鍾意做嘅嘢，都好戥我開心！」

原來Aimee爸爸兒時夢想當導演，曾試過寫劇本後與全班同學一同表演，可能因為這個原因，她與弟弟從小愛演戲：「有時我接到劇本之後都會問爸爸意見，佢會同我討論應該點樣發揮，我諗每個角色都唔同，以前劇本嘅中文我要靠爸爸幫手翻譯英文拼音，但我依家進步咗好多，逼自己唔用拼音，努力認字！」Aimee表示要看懂劇本，惟有平日多看新聞，看字幕認字，但她發現原來拍劇學中文是最快途徑，因為很多日常生活中的難字都會應用於劇本中。