華哥獲無綫派糖殺入視帝五強

據知視帝五強除了林峯、黎耀祥、陳豪及馬浚偉外，炮轟無綫的黃日華同樣入圍，據悉，無綫此舉除了博華哥參與增添話題外，又可順應民意！

將於下月5日舉行的台慶頒獎禮掀起全城熱話，視帝視后誰屬更成焦點，鑑於憑《義海豪情》入圍的黎耀祥去年已登帝座，故今年視帝勢必是收視爆燈的《公主嫁到》主角陳豪，以及獲六嬸方逸華題字打氣的林峯之爭。不過，近年無綫從善如流，堅持不簽約換獎的夏雨及祥仔均順利稱帝，有見及此，無綫今年再使出一招「估你唔到」，將狂轟無綫的《刑警》主角黃日華納入五強之列，而「親生仔」兼半冷的馬浚偉亦憑《蒲松齡》入圍。

宣萱慨嘆「普通宣傳」

經無綫安撫後，華哥昨日與苗僑偉（三哥）、宣萱及胡定欣等宣傳《刑》劇，《東張西望》更隨即安排主角專訪補鑊！心情大靚的華哥說：「我冇發火呀！（安排專訪補鑊？）好難講，《義》劇播完會多咗時間分配畀其他劇！（熄晒火？）冇發火呀！（去頒獎禮？）睇三哥頭，佢去我咪去囉！其實一開始我都話頒獎禮係遊戲一場，我只係着重觀眾嘅口碑！」又直言睇好祥仔及雯女冧莊。至於三哥則笑說：「唔知會唔會邀請我出席，或者入唔到圍唔使去呢！華哥冇再講唔幫無綫拍劇啲決絕說話，有進步喇！」

至於宣萱則認為「隱形」是尊重與否的問題：「我有被邀請，但唔得閒出席！（宣傳唔夠？）依家係基本宣傳模式！（呢套係台慶劇喎！）係普通電視劇宣傳！都預咗同《義》劇宣傳唔同，習慣晒啦！」此外，《義》劇監製李添勝亦倒戈力撐華哥：「又係衰嘅！台慶應該預番一Part畀《刑》劇！」