泳兒恨搵男友陪過浪漫佳節
日前獲邀為商場聖誕裝飾揭幕的泳兒，刻意打扮得充滿節日氣氛，獻唱新歌及與小朋友玩遊戲，場面十分熱鬧，她說：「其實我一向都覺得香港聖誕燈飾好靚，但依家除咗尖東之外，其實好多商場啲布置都好靚，今日嚟到呢個商場，見到棵聖誕樹掛滿晒熊Bear Bear，真係好得意！」
泳兒獲大會送贈人氣插畫家馬仔設計的聖誕熊，立即抱在懷內，充滿孩子氣，她說：「今日見到好多小朋友，又有好多熊Bear Bear，好似啲童年回憶返晒嚟咁。（點過聖誕節？）暫時未知，但多數要工作。（搵個男人陪？）唉！我都想，聖誕節咁浪漫嘅節日，都想有個男朋友陪我過節，希望快啲有人嚟追我啦！」
泳兒為商場擔任揭幕嘉賓，並即席獻唱新歌。
泳兒與小朋友大玩遊戲，預早迎聖誕。