阿倫Mr.重燃Band火

樂隊Mr.乘去年《如果我是陳奕迅》一曲的氣勢勇闖大中華市場，更獲伯樂譚詠麟（阿倫）支持，早前推出廣東及國語合碟《Rolling Power》，自言是總指揮的譚校長表示，與五子合作令他搵番當年夾Band那團火！

校長譚詠麟向來喜歡提攜後輩，由他親自嚴選的樂隊Mr.更是他的「掌上明珠」，校長大讚五子有前途，並指這次比平日付出多10倍努力：「今次隻碟Target係珠江三角洲7千萬人同內地7億人，真係做得好辛苦！我今次係總指揮，不過因為5月嗰陣要搞自己嘅演唱會，所以惟有用E-mail同佢哋溝通！」

五子感激支持鼓勵

Mr.結他手MJ有份為新碟填詞：「因為首歌有廣東同國語版本，所以同內地嘅填詞人多咗好多溝通，真係學到好多嘢！」鼓手Tom直言新碟的歌很難唱，每日要瘋狂苦練，他說：「有時一日先錄得一首歌，成隻碟花咗兩個幾月去錄！」而低音結他手Dash感激校長的支持及信任，並認為香港樂壇已不斷萎縮，歌手間應加強合作、互相幫忙：「以前廣東歌喺華語市場好有影響力，我哋希望可以返去嗰個盛世，當然Mr.只係新單位，冇資格為樂壇做咩貢獻，只係想Keep it Roll，所以新碟先叫《Rolling Power》，呢個名都係校長諗o架！」