何韻詩設計變態Game搬上舞台

何韻詩為滿足「港迷」，甘願放棄搵真銀機會，將於聖誕節假伊館舉行三場音樂會，充滿理想的阿詩坦言為了音樂犧牲很多！

何韻詩早前為宣傳處女國語專輯《無名．詩》在台灣及內地舉行多場音樂會，令不少香港樂迷呷醋，在官網留言要求在港開騷，阿詩為免被指「大細超」即與公司開會反映，更即時入紙申請新伊館檔期，最後獲批下月23至25日聖誕檔期開騷，阿詩說：「呢個計劃原本冇，知道好多歌迷投訴，即刻入紙申請，估唔到批到呢三日。」問到為何不在紅館舉行？阿詩說：「冇可能申請到紅館，因為係上個月先決定，搵到伊館已經好好，雖然係喺伊館搞，但用紅館製作。」

入行十周年「大搞」

聖誕檔期是歌手搵錢好機會，阿詩笑說：「我哋為音樂、為理想犧牲好多。」每年都會搞聖誕派對的阿詩提議加設遊戲環節，她說：「我最無聊，正經嘢唔見咁積極，一有Party就費盡心思諗遊戲，仲要係最變態嘅遊戲，今年可以叫晒所有朋友上台玩。（有冇諗過請嘉賓？）冇，喺呢個時間唔阻人搵真銀啦！」

明年便是阿詩入行十周年，她有意舉行舞台劇慶祝：「公司一直都好支持我。（冇試過阻止？）冇，次次都滿足我。」阿詩坦言要求不過分會「睇餸食飯」，亦不會令公司蝕錢，她說：「好多時（指支出同收入）都係扯平。」她更哈哈大笑說：「唔緊要啦！公司仲有好多歌手賺錢。」