林欣彤尖叫唱歌壯膽
林欣彤（Mag）和胡鴻鈞昨日到海洋公園，率先試玩機動遊戲，同時大唱聖誕歌測試膽量，結果胡鴻鈞嚇到「硬晒車太」，擘開雙腳不敢張開眼，更忘記唱歌！
巨聲二幫的林欣彤（Mag）昨日聯同胡鴻鈞到海洋公園，與盛智文試玩機動遊戲「翻天覆地」，Mag尖叫聲不斷，但仍不忘唱歌，反而事前聲稱「冇底線」的胡鴻鈞卻嚇到冇聲，全程張開雙腳、緊閉雙眼，場面搞笑。事後Mag坦言很刺激：「我初初放鬆唔到自己，之後逼自己張開眼，但係分唔到方向o架！」而胡鴻鈞則死撐只是緊張：「我有嗌，但唔記得唱歌，有種天旋地轉嘅感覺。」
滿意新片表現
Mag表示剛放學趕來，對於要兼顧工作及學業，她抱堅持的態度：「仲有半年就完成學業，唔想白費。（應唔應付到？）有時會比較攰，但我寧願犧牲私人時間囉！」
現正拍攝賀歲片《我愛香港》的Mag透露，其戲份還未完成，卻期待有好表現：「我聽咗啲前輩嘅意見，尚算滿意。（多唔多NG呀？）應該OK！我有次同陸永同場，佢爆肚我跟唔到，即刻爆笑！嗰場就有NG！」此外，她尚未知道聖誕節的工作安排，但會與家人及朋友食飯補祝。
剛放學趕來的Mag表示，寧犧牲私人時間，亦要堅持完成學業。
Mag玩機動遊戲時尖叫及唱歌，而胡鴻鈞則嚇到冇聲！
胡鴻鈞（左起）、盛智文和Mag試玩機動遊戲。