「藍男」各自風騷福祿壽洩娥姐泳照掀高潮

無綫台慶騷中，近日公開的「藍男戀」成為另一焦點，女主角李亞男以一身啡色高衩裙晒玉背，連男友王祖藍也讚靚，她說︰「佢同我一齊拎嘅。（着咁少祖藍詐型？）佢話靚就冇所謂，尊重我意見。」但影相時不小心露出黑色打底褲。此時，路經的阮兆祥取笑說︰「阿嫂嚟喎！阿嫂好靚。」李亞男透露與男友一起化妝時經常被稱呼「阿嫂」。

男主角王祖藍與「福祿壽」阮兆祥及李思捷主持的《第一屆福祿壽頒獎典禮》，掀起全晚高潮！他們首先頒發「TVB五大傑出青年」獎，分別由黎耀祥、李香琴、謝雪心、商天娥及麥長青奪得，宣布得獎者時在屏幕播出他們的陳年舊照，祥仔的性感綠色泳褲照晒六舊腹肌，全場尖叫！商天娥的少女Fit爆泳衣照亦引起現場哄動，「福祿壽」笑言娥姐當年於淺水灣拍攝時，定必令不少在場男士流鼻血！至於麥長青的一張舊照被指與現時的林峯有九成相似，福祿壽笑說：「咁就表示林峯十年後就係今日嘅麥長青！」全場爆笑。他們還自設「四台聯頒大獎」，由無綫四個免費電視台聯頒，得獎者當然由創辦人邵逸夫奪得，他得悉後對着鏡頭報以微笑。

至於李亞男稍後與謝天華等在台上大跳濕身舞，周家蔚與張嘉兒跳舞時將外套拉低，拋胸大晒「事業線」。王君韾表演時不慎跣腳，事後她表示昨日負傷表演，感覺不到跣腳︰「我尋日痛到起唔到身，去睇跌打話我坐骨歪咗同右腳拉傷，嗰陣痛到喊出嚟。」