李莉琳搵番條腰向DaDa宣戰
新一年年曆拍攝在即，「翻版大S」李莉琳（Liz）做足準備趕走水腫，誓與同門「百果園咪神」陳靜（DaDa）鬥省鏡，Liz自嘲身材唔夠，惟有勤力搭夠！
李莉琳（Liz）向來有「翻版大S」之稱，標致五官和嬌小身材，吸引廣告商青睞，但私底下Liz透露，多年來飽受水腫困擾：「每次做嘢我都要提早四個鐘起身，等個樣可以收吓腫，好多方法都試過。（係咪趕拍年曆前收身同陳靜鬥靚？）邊有得鬥呀！佢咁『勁』！自己身材唔夠勁，梗係要做多啲工夫。」
欠缺運動細胞
Liz嫌身形不夠完美，最不滿意缺乏腰形，故到美容院做機瘦身，她說：「雖然我細粒，手腳算長，但腰就好短，點瘦都未試過有蛇腰，惟有Keep住做多的機，冇辦法啦！我冇乜特別興趣，由細到大都冇參加課外活動，同好多女仔一樣，欠缺運動細胞。」Liz直言扮靚並非為搶鏡，只認為時刻裝備自己是每個模特兒應有態度，她直言和DaDa向來老友，不會互作比較，更說因為大家都單身，經常互相作伴：「有時覺得冇男朋友都幾好，可以專心啲做嘢，淨係屋企人有時會提吓『點解個女冇拖拍，會唔會做老姑婆o架！』」
Liz嫌自己腰形不夠靚，最想擁有蛇腰。
Liz到美容院做機，趕走水腫。
感情一片空白的Liz被家人催婚，擔心她變「老姑婆」。
為了去水腫，貪靚的Liz試勻所有方法。
DaDa拍攝性感年曆，俘虜宅男。(資料圖片)