支持陳總拆掂四大困局 陳慧琳：好Miss TVB！

潮媽陳慧琳（Kelly）昨日出席《wtc more世貿中心白色聖誕˙魔幻森林》揭幕禮，身為「四大」歌手之一的Kelly，對於盛傳陳志雲將赴美跟四大唱片總公司解決糾紛，她說：「好呀！絕對贊成，希望佢真係做到！（係咪好Miss TVB？）係呀！之前出碟都冇機會唱歌，真係好耐冇喺香港唱歌喇！（冇去其他電視台？）當時都唔係宣傳期。」曾任《志雲飯局》嘉賓的她，祝福志雲復職工作順利。

聖誕全力造人

Kelly表示今年不會參加任何頒獎禮，對於港台提出停辦今年「四台聯頒音樂大獎」，以致英皇及東亞聯手發聲明永不參與角逐該獎項，她說：「佢哋唔玩咪即係冇人玩？（港台宣布重設傳媒大獎，但唱片公司唔撐？）咁算啦！唔攞呢個獎，咪攞第二個囉！咁多獎，總之個個和睦相處，唔好搞嚟搞去！（喺屋企睇頒獎禮？）如果喺屋企都會捧場。」

此外，Kelly揚言已擬定「造人」大計，問到會否在聖誕「實行」，她說：「Anytime，依家好努力！（想生仔定女？）冇所謂乜都得！有人陪個仔就得。」她又透露已添購不少烹飪書，準備炮製燒春雞給愛兒享用：「不過佢最鍾意食碟頭飯！（送乜畀老公？）送對襪畀佢，因為佢好多爛襪，可以做古董，係佢嘅傳家之寶！」