史嘉娜寸爆Ke$ha冇矜持

性感女神史嘉娜祖漢遜日前於節目大解放，喪扮電影及真人騷角色，又大唱歌劇寸蘭茜露漢阿媽及歌手Ke$ha，發揮鮮為人知的喜劇細胞！

被封為荷里活性感女神的史嘉娜祖漢遜，上周六於節目《周末直播》放下身段，一口氣扮演不同角色，大放笑彈！伊人出場時扮電影《芝加哥》角色獨白，用阿媽口脗忠告眾女星，教她們如何保持低調：「你哋可以着番條底褲先，唔使兩秒就着到，好方便o架！底褲係你哋嘅朋友！」轉頭又寸自拍春宮帶的女星：「有膽拍就唔好畀人踢爆時扮驚訝，一係就唔好拍，想睇番就對住塊鏡做啦！」她更與兩位分別扮蘭茜露漢阿媽甸娜及Ke$ha的演員合唱電影名曲《Class》，騷歌喉之餘，更寸她們不檢點，冇女人應有的矜持！

唱歌之外，史嘉娜又玩寸新片《煞破天劫》，扮飾演火車公司人員的羅莎莉奧多遜，幾可以假亂真！然後再扮真人騷《The Millionaire Matchmaker》潑辣主持Patti Stanger，幫宅女搵男友，可謂入型入格！

女版《斷背山》夠抵死

扮開有條癮，史嘉娜更「返老還童」頭戴選美后冠，扮16歲大肚妹送入急症室等生仔的情節，然後換上校服拍迪士尼短劇，效果頗為震撼！玩完女星，她更扮女版《斷背山》，情節無聊得來卻十分抵死，再與諧星Andy Samberg扮已婚拉丁女人，於節目上用重口音英語對話。整個節目中，史嘉娜每個造型都有驚喜，看來她可轉戲路拍笑片！