Twins百萬鑽飾閃爆全場

Twins昨日勁晒逾百萬鑽飾出席英皇珠寶舉行的活動，閃爆全場。近日是非多多的蔡卓妍（阿Sa）強調已回復「蔡小姐」之名，隨緣面對「陳蔡戀」。

蔡卓妍、鍾欣桐（阿嬌）、泳兒、鍾舒漫（Sherman）及詩雅昨日出席《英皇珠寶「瑰麗典藏」珠寶首飾預展綻放耀目光芒》活動，眾星穿上華麗服飾擔任模特兒，當中以Sherman的BCBG低胸連身裙最為性感，大晒D Cup咪咪，相反向來「有料」的泳兒竟以Gizzy & Nacho白色裙包到冚！同場出席嘉賓還有英皇鐘錶珠寶董事總經理楊諾思、英皇集團主席楊受成夫婦及囝囝楊政龍等。

阿Sa及阿嬌分別佩戴「長城」及「靈芝」系列鑽飾，各值逾百萬元。對於最近有報道指阿Sa在法律上仍是「有夫之婦」，但高調公開與師弟陳偉霆（William）拍拖，阿Sa說：「一早搞好法律上嘅手續，我係蔡小姐。（幾時回復呢個身份？）上次已經交代咗，我哋分居年幾，法律上手續已經辦妥。」另外，有傳因阿Sa秘密與William拍拖，觸怒經理人霍汶希（Mani），阿嬌即搶答說：「佢早知啦！」阿Sa亦表示與Mani有聯絡。

阿Sa對婚姻冇恐懼

至於何時與William結婚？阿Sa說：「冇咁快諗呢個問題，對婚姻冇恐懼，結婚要諗清楚，兩個人相處係好大學問。（上次冇諗清楚？）都話唔再講呢啲嘢。」阿Sa承認公開戀情後，William壓力很大，不過同時亦是個考驗。提到阿嬌早前於微博爆出阿Sa不公開離婚真相已「仁至義盡」？阿嬌補鑊說：「我自己諗之嘛！」至於前緋聞男友被指與兄弟DJ Tommy反目，阿嬌說：「唔關我事，佢嘅嘢唔好問我啦！」並表示一切就如新歌歌名一樣，《放低過去》。同場的詩雅及泳兒被鍾舒漫搶「峰」頭，詩雅自嘲冇身材：「我太瘦喇！依家都係着緊中童衫，可能細個冇飲奶，畀家姐飲晒。」