王菲微博癮發作失蹤速閃

剛完成北京演唱會的王菲，昨晚畀面出席化妝師Zing的攝影展，打扮前衞的王菲，全程不接受訪問，並快速閃人，令久等的傳媒大為冇癮！

昨晚化妝師Zing舉行慈善攝影展，眾明星好友應邀捧場，包括甚少蒲頭的王菲、劉嘉玲、舒淇、李美鳳、琦琦、Cara G.及葉蒨文等，王菲自然是焦點所在。紮髻、身穿黑色連身裙襯長皮靴的王菲笑容滿面，獲Zing熱情款待和合照留念。但不擅交際的阿菲，寒暄3分鐘後便火速閃走！原來中了微博毒的她，與好友網上聊天。影大合照時，司儀鄭丹瑞邀請王菲上台，但她未有聽到，直至所有嘉賓齊集後1分鐘，王菲才尷尬上台。合照後，王菲晚上8時半極速閃人，未有受訪，並由女友人陪伴下往金鐘酒店。

至於王菲好友劉嘉玲則穿上山本耀司的服飾、佩戴逾7位數字的卡地亞高級珠寶系列頸鏈。談到被Zing譽為20位最美麗女人之一，嘉玲謙稱對方太抬舉自己，問到心目中的美女？她笑說：「我鍾意紅姑（鍾楚紅）。（好多人工美女？）靚啲無妨，但我暫時冇需要。（你唔理拍戲受傷嘅梁朝偉？）你覺得我會唔會唔理佢？（Check住佢？）我識佢第一日已經唔會Check佢，我哋每日通電，好似家人式嘅問候同關心。（佢會嗲你？）都會，又唔係話嗲，但我喺度佢會定啲。（你唔同嘛？）如果我喺度，佢就嫌我阻碇，我要喺適當嘅時候出現。」談及並非《最強囍事》女主角和片酬不及張栢芝，嘉玲說：「我從來都唔係第一女主角，只不過我同導演熟，加上甄子丹想我做一個角色，所以先拍。」

舒淇否認為黎明抑鬱

而舒淇同樣佩戴逾七位數字的卡地亞高級珠寶系列手鐲及戒指到場，對於有指與黎明分手後患上抑鬱？她說：「我唔係咁嘅意思。（樂基兒話希望你開心？）我不嬲都好開心！（有抑鬱？）我係講緊拍《最好的時光》個角色有啲抑鬱，要時間抽離。（拍拖會否抽離？）我會投入咗先，如果可以一齊就最好，但應斷則斷。」