蔡穎恩拍吊頸戲險窒息
任達華與蔡穎恩繼電影《歲月神偷》後再度攜手，與內地演員陳燃及張然合作新片《天馬行凶》。戲中任達華飾演殺手為自殘的年輕人了結生命，而蔡穎恩則吊頸死，由於首次拍吊威吔戲，事前她十分緊張，正式埋位上吊時更痛苦不堪，她說：「被吊嗰時真係抖唔到氣，我用手嘗試拉條繩，但都係唔得，不停掙扎，工作人員以為我交戲，好在導演及時嗌Cut，真係嚇餐死！」
任達華表示今次因劇本吸引才接拍，對於最近有指不少大明星加片酬，他說：「呢啲係供求問題，有人覺得你值呢個價就會搵你！」而他昨日與太太琦琦出席《Salvatore Ferragamo活動》，近日華哥多拍夜戲，非常辛苦，琦琦鼓勵他購物獎勵自己，故他決定下月起休息，負責湊女及Shopping！但他強調只會休息一個月，其後會打回原形：「到咗1月我要返工，輪到琦琦Shopping。」
蔡穎恩拍吊頸戲緊張到暈，身旁的任達華搞笑地為她減壓。
任達華與老婆琦琦拍拖出席活動，十分恩愛。