攞正牌Sell事業線 呂慧儀火併莊思敏自嘲小人物

呂慧儀終守得雲開成為「晶女郎」，被欽點成「女一號」的她，昨日與拍檔莊思敏以比堅尼現身片場鬥身材，更抵死地表示站在對方身旁頓變「小人物」！此外，呂慧儀自嘲除了賣「事業線」外，更大賣低能與白癡！

王晶監製、由舞台劇《潮性辦公室》改編的同名電影昨日在清水灣片場開鏡，邀得詹瑞文、呂慧儀及莊思敏等傾力演出。期間，以三點式示人的呂慧敏與莊思敏又攬又錫，搶盡「峰」頭！榮升「女一號」的呂慧儀，飾演一名入世未深、經常成為他人性幻想對象的女文員，她直言已向無綫「攞正牌」：「事前我同莊思敏都可以免費跟詹瑞文學戲，佢話我今次嘅任務係表演『事業線』喎！（擔唔擔心被定型？）我仲有好多嘢可以Sell，好似白癡同低能，完全切合今次角色！」

互笠高帽讚「好手感」

同屬模特兒出身的呂慧儀與莊思敏老友鬼鬼，拍攝期間曾互相驗身，更大讚彼此同樣「好手感」，呂慧儀笑說：「企喺佢隔籬，我呢啲咪『小人物』囉！」談到男友吳浩康在微博慨嘆因事業陷低潮而「復出」打泰拳，莊思敏說：「知佢有呢個打算！（擔心？）擔心佢打死人？哈哈！以前練習佢成日手腫腳腫，總之唔好打到塊面就得！佢依家喺屋企好勤力寫歌，我會全力支持佢！」

林嘉欣邀恩師赴加探望

此外，詹瑞文表示已接獲林嘉欣電郵，誠邀他與太太到加拿大探望，惟因工作繁重，故最快要下月才成行，他更趁機讚自己腳頭好：「同我過合作嗰啲女演員，轉頭就有幸福家庭！」