周秀娜咪咪蒲頭 胸殺郭思琳

周秀娜（Chrissie）封胸一段日子後終於解禁，昨日出席活動時，毫不吝嗇其深長的事業線，性感程度爆晒燈，寒冷天氣隨即升溫！

周秀娜、崔建邦新緋聞女友郭思琳與新Canon女Melanie Z.昨日化身3D車模出席GT5極速賽車啟動禮，Chrissie最為搶鏡，露出深長的事業線，揮低露腰的郭思琳與Melanie，就連郭思琳都覺輸蝕，她說：「我冇事業線呀！」Chrissie接受訪問時表示Dream Car是甲蟲車及Mini Cooper，但自嘲是跑車殺手：「我諗過買車，但去到車行，個經紀就介紹跑車款式，我根本揸唔掂呢款車，我試車時，個經紀一路面青，之後仲差啲撞車，個經紀都唔敢再叫我試其他款呀！」問到男友可會做「柴可夫」？她即自爆與男友正處於冷靜期：「我覺得女仔揸車型啲！何況我哋呢排係冷靜期。（鬧交呀？）嗌交實有，好小事啫！（依家係急凍期？）叫佢送車氹番我囉！」

不擔心觸怒唐詩詠

此外，郭思琳坦言與崔建邦有電話聯絡，問到對方醉駕一事，她竟然大讚對方勇敢，肯承擔責任：「我哋各有各忙，都冇再約出嚟！（係咪畀人踢爆唔敢出？）當晚係一大班人。（人哋話佢係散餐王？新速食王？）唔清楚！」她又表示不會與崔建邦講心事，故不擔心觸怒唐詩詠，至於對方是否有意追求？她耍手擰頭地說：「我只鍾意高過我嘅男仔。」