祖兒有信心捧歌手獎 阿詩撐到行

年底將至，是樂壇派發成績表的日子，昨日《叱咤樂壇流行榜頒獎典禮》率先舉行記者會，叱咤女歌手大熱的容祖兒信心十足，好友何韻詩更撐到出面！

明年1月1日舉行的《2010年度叱咤樂壇流行榜頒獎典禮》，昨日以「樂搞叱咤」為題舉行記者會，祖兒、謝安琪、何韻詩、陳偉霆及鍾舒漫等半百歌手以特別造型現身。

基仔腰患撐拐杖

早前腰患復發的古巨基要撐拐杖步行，專業精神可嘉！本報昨日率先披露《叱咤》走勢，在叱咤女歌手獎中大熱的祖兒及謝安琪，先禮後兵，大合照時不停密斟，祖兒直言因四大唱片問題很少在電視台見到對方，才雞啄唔斷。穿MMM紅黑衫的祖兒，盡顯天后風範，對於暫成叱咤女歌手大熱，祖兒直言信心十足，但強調志在參與：「參加咗咁多年，成績係點冇所謂，依家集中作戰喺演唱會！」

前日何韻詩在微博上自爆曾探祖兒班，對此祖兒說：「佢成日問我有幾勁，尋日（前日）佢趁返內地做嘢前就嚟探班。」她笑言單是拉筋已需45分鐘，令對方甚不耐煩，而阿詩則踢爆祖兒因個唱壓力大而喊：「我知佢辛苦，所以去支持吓！香港有個跳到咁勁嘅女歌手要珍惜吓！」她透露恨睇祖兒個唱尾場，故不斷更改其檔期瞓身支持！

望四台以和為貴

同是叱咤女歌手熱門的謝安琪，則以平常心面對：「今年只出國語碟、拍戲，參與公益事務，已經大豐收！頭先同祖兒傾偈，覺得佢好Fit好瘦！佢係個好強嘅女仔！」至於「四台聯頒」問題，祖兒希望以和為貴：「獎都係想嘉許應得嘅人，如果個獎一方唔認同都唔成立，不過獎都係喺心裏面，攞多攞少都唔會影響樂迷心目中個獎。」而謝安琪認為獎項可證明努力沒有白費，因而支持保留此獎。