「緋聞男友」敖嘉年遭照肺

日前梁靖琪「緋聞男友」敖嘉年在新劇煞科K局上與冼灝英起衝突，眉骨被打歪爆裂縫針！據目擊幕後人員爆料指二人因「飲大咗」，嘉年意氣風發向冼灝英手指指而辣着火頭。對於被指是「先撩者賤」的行為，監製李添勝翌日即訓示嘉年！

敖嘉年憑《巾幗梟雄之義海豪情》中「排骨仔」一角上位，更熱炒他穩奪台慶「最佳男配角」，有指他為此心雄，在K局上吹噓自己會爆紅，說話時更向冼灝英手指指辣慶對方。一手捧紅嘉年的李添勝得知「愛將」辣火頭極為心痛，翌日召見嘉年，他在電話中承認：「係！第二日嘉年上嚟Check通告，我見到佢咪即刻叫佢算數啦！大家都係同事，事情都發生咗，我仲勸嘉年對外說話要好聽啲，畀啲量度大家睇！我覺佢受嘅，佢識諗嘅，捱咁多年個人都成熟啦！」而嘉年則不作回應。

祖藍撐「師叔」脾氣好

另外，昨日王祖藍出席活動表示早上見過嘉年，指對方「一切安好」，同時透露冼灦英是父親的師弟，並力撐他：「同佢合作過拍劇，我當時係咁打佢，佢脾氣好好喎！幾夾到！」一臉疲態的他還透露前晚與杜汶澤出席高雄電影節，昨晨急急趕返港，其後又要準備福祿壽演唱會，並為還飛債感煩惱，他更踢爆阮兆祥要求600張門票！問到籌備進展如何？他說：「我哋會喺會展上天下海，搞好多花臣！最驚係歌衫太天花龍鳳而超支。（冇陪女友？）呢個月唔使旨意見，TVB生日係我哋藝員嘅死期。」