周柏豪G.E.M.腦網情人

今時今日人人愛玩iPhone、Facebook，鄧紫棋（G.E.M.）與周柏豪全靠微博牽紅線，一個與台灣音樂才子林宥嘉「金魚傳情」，另一個則與賭王千金何超雲憑歌寄意，原來新一代的愛情，早已無身份權貴及地區界限。

千金難求，千金小姐更難求，80後周柏豪由模特兒轉型做歌手，深得女Fans愛戴，連賭王千金何超蓮也成為「追星族」，超蓮早前介紹柏豪給姊姊超雲相識，原本風馬牛不相及的人，突然在微博密密傳情，「柏雲戀」愈傳愈烈！今年25歲的柏豪表示，與超雲是好朋友，尚未發展成情侶，但兩人的確在微博傳情，柏豪一句戲言與楊愛瑾拍拖，超雲即九秒九回應：「不是我嗎？」肉麻當有趣，柏豪說：「大家係年輕人，有時說話唔好當真，我同佢係朋友，識咗一個月，連街都冇出過！」但緣分來的時候，擋也擋不住，雖然不曾「去街」，但彼此清楚底蘊，豈不是更曖昧？要他詳述與何家姊妹的相識經過，柏豪大方毫不隱瞞：「同超蓮有共同朋友，佢去過我幾次簽名會，4月時我做舞台劇，超蓮話想嚟，但當時屋企有事嚟唔到，我應承佢下次有騷會叫佢，到今年9月我做舞台劇問佢有冇時間睇，之後就識咗超雲！」

保護女友拒晒戀情

與富家女結緣，柏豪不會因對方身份而感壓力，他大讚超雲人品好又靚女，沒有千金「氣派」：「佢個人好好，唔會因為係賭王個女，富貴人家就會有咩架子，又孝順。其實到今日我哋都冇去過街，因為佢唔喺香港，大家喺網上面傾偈，有微博、Facebook同MSN！」這段「柏雲戀」卻成為他身邊朋友的一個笑話，朋友不時向他拿取「泥碼」，連老友陳柏宇也公開潤他，難得柏豪沒有生氣：「佢講笑！我同佢嘅友誼有80%存在講笑、吹水，同佢一見面就講無謂嘢！」問到將來可有機會發展，柏豪直言一切有可能發生：「好難會答你冇可能，萬一10年、20年後一齊咗，大家咪覺得我講大話！但就算真係拍拖我都唔會公開，我唔鍾意講私人嘢，亦唔想攞我愛嘅人出嚟講，愛人應該要保護同收埋。」

狂掘金夢想做老闆

原來愛情對柏豪來說永遠都是排到最後，在他心目中家人、朋友及事業才是最重要：「依家25歲，可能40歲我會將愛情排第一，因為到時愛情會變家庭，屋企人永遠都任我做想做嘅事，其實咁樣我好內疚，之前做舞台劇有3個月冇返屋企，3個月冇見阿媽。我要加把勁，如果到30歲再一事無成，咁就大鑊！」今年又拍戲又出唱片的他，直言在香港做歌星很艱難：「你睇Justin Bieber，頭一年搵到8億港元，16歲第一件禮物就係一架林寶堅尼，外國歌手郁一郁隻腳，可以搵到5萬蚊，香港歌手郁晒成身，先可以搵到50蚊！」但他未有為做歌星仔氣餒：「雖然依家未搵到第一桶金，但我好享受，如果要賺錢，我唔會入呢行，我會留喺陳光榮度做廣告！依家我想做好音樂，第二想從事Fashion，希望做老闆組織一個班底。其實我好細個已經咁諗，好想有一支軍隊，身邊嘅人等緊我，要錢之嘛！（叫超雲投資？）唔使，我有老闆，上次做碟已經搵到啲同自己意向差唔多，好似導演、創作同影相嘅人喇！」

後記：「冇樣睇」婆婆擔心

每個人都有夢想，正如柏豪所言不希望一事無成，屬華納旗下的他「無奈」被無綫封殺，最好笑連婆婆都以為孫仔「冇得撈」，他說：「阿婆唔知我有幾多Fans，因為佢喺電視見唔到我，以為我冇嘢做，佢淨係睇電視，唔會聽電台，習慣性只睇一個電視台，所以我唔喺電視出現佢就覺得我冇嘢做，冇嘢做即係冇錢！佢仲成日都話畀錢我生仔，哈哈！」孫仔咁靚仔，還與何家千金傳緋聞，看來周婆婆是時候玩微博喇！

憑巨肺在樂壇平步青雲的90後金魚女G.E.M.，愛情路上同樣多姿多采，入行兩年緋聞猶如雪花飄，近日最新鮮的是與台灣音樂才子林宥嘉相戀，有指二人戴上定情手繩，林公子更禁不住愛火，把微博大頭相化作「金魚男」，令「宥紫戀」傳到似層層！不過藝人要公開談情絕非易事，何況是偶像派，G.E.M.選擇將感情地下化，斬釘截鐵地說：「有冇拍拖都唔講！」其實G.E.M.對戀情從來口密，原來她入行以來與圈外男友Aaron拍拖兩年，去年分手時亦未有透露半句，直至最近才自爆失戀：「佢係普通學生，成日畀人跟，我唔想佢承受啲唔需要嘅壓力，不過呢個唔係分手原因。其實我都有心理準備。依家講出嚟，係因為大家分咗手，唔會再影響佢，如果一齊，我怕同佢出街會畀人指指點點。」

22歲結婚杜絕緋聞

守了兩年的秘密終於解開，接下來當然要問G.E.M.是否發展「宥紫戀」，她同樣答得模棱兩可，似乎不想將緋聞當成焦點：「其實一開始啲人講，我真係冇所謂，依家每次出嚟就提第二個人，我覺得好轉移視線，所以唔想講其他人。之前我去台灣拍MV畀人話炒緋聞，我根本冇做過！就算依家拍拖都唔公開，到結婚先公開！本來我想25歲結婚，依家想提前到22歲，如果快啲結婚，咪唔會有人再畀緋聞我！」雖然G.E.M.「密封」戀情，但提起過氣緋聞男友陳偉霆卻未有介意，對於他與蔡卓妍（阿Sa）譜姊弟戀，她說：「知佢哋拍拖，我第一時間打畀佢問係咪真，當時阿Sa都喺佢隔籬，希望佢哋幸福！」

無懼林欣彤下戰書

近日推出第三張大碟《MySecret》的G.E.M.，為了一手包辦10首歌的填詞部分，寧願閉關9個月，她坦言感受到19年來前所未有的「黑暗期」：「隻碟由一個秘密開始，我將好多想法同體驗放咗落去，因為秘密開始咗，我經歷好多唔同嘅心情，有唔開心，有好多壓力，思緒好混亂。」做碟有壓力，作為巨肺小天后的她又遇上強勁對手，《超級巨聲2》冠軍林欣彤在比賽時獻唱其歌曲《A.I.N.Y》大獲好評，G.E.M.遇強愈強：「我覺得佢作為參賽者唱我嘅歌，感覺好得意，好似諗番自己以前參賽咁，我希望佢唱完呢首歌，可以喚醒其他參賽者唱多啲我嘅歌！其實呢啲比較係人寫出嚟，諗住觀眾鍾意睇，認為觀眾鍾意睇人鬥，所以要我哋喺擂台搏擊，實際上我唔覺得存在呢啲比較。」

後記：慳妹掘金唔大使

G.E.M.並非「草莓族」（不敢面對現實的90後），她善於運用電腦谷歌，上YouTube頻頻Plug歌，靠Facebook推動音樂力量，19歲妹妹仔財源滾滾來，其實她是慳妹一名，正當訪問完畢與她離開酒店時，赫然發覺她用了逾一年的波點背囊終於消失了，她說：「係，爛咗！」而「新歡」是個更實用的背囊款式，但願她永遠保持這種節儉美德，將來定必為億萬金魚。