西營盤滿載童年回憶 羽翹重遊高街鬼屋
西營盤孕育了女歌手羽翹，該區除了是她的出生地外，亦是她整個學生時期的活躍點！拍攝當日，羽翹做領隊帶大家遊海味街、高街鬼屋等勝地；腳踏幾吋高跟鞋的她，挑戰港島區獨有的多條「長命斜」，行到氣喘兼標汗！
多年來，羽翹在位於半山的西營盤留下不少腳印，因為她的小學、中學和大學時期都在這裏度過；而追溯最初，她亦在這裏的醫院出世，與西營盤可謂淵源深厚！阿翹說：「我喺贊育醫院出世，之後搬咗去長洲住，到小學三年級再返嚟住，之後一直都喺度讀書。雖然中間搬過屋，但都離唔開呢區。」
西營盤保留了舊區的面貌，更有不少特色的地標，例如味道獨特的海味街、入夜陰森可怖的高街鬼屋等，阿翹說：「我覺得呢區靜中帶旺，由於喺半山，有好多斜路，細個放學成日會行返屋企，雖然行到喘晒氣，但練成超強腳骨力！呢區亦都好多學校，放學時間見到一班班學生仔，好可愛！」
女同學戀事被篤爆
經過一間老字號粥店時，阿翹回想起中學時代的一件趣事，即時笑爆嘴：「中學放Lunch，我哋會出街食飯，呢間粥店係其中一個打躉處。記得嗰時有個女同學死口唔認拍拖，有日我哋去食粥，個老闆娘拎住張相同佢講：『喂！同學仔，你同你男朋友漏咗張相喺度喎！』穿晒煲，笑到我哋死！」
來到高街，當然要與已改建成社區綜合大樓的高街鬼屋合照。
港大畢業生羽翹重返母校，表現興奮！
羽翹在贊育醫院出世，自小已與西營盤結下不解緣。
羽翹見到經典閃卡機，即瘋狂衝前合照。
羽翹與聖嘉勒小學牌匾合照，遇上放學時間，小學生擠滿身後。
海味街的海味多不勝數，羽翹大讚夠特色兼價錢平！