楊丞琳Amanda S.潮散少女味

一班女星無懼天氣轉冷，繼續露肩短裙出擊，不過太暴露未必好，大晒事業線的呂慧儀，被時裝設計師郭慶彬彈低俗！反而Amanda S.最為搶眼，新鮮出爐的《金鐘獎》視后楊丞琳打扮新潮恰到好處！

楊丞琳

「黑色連身裙本身冇咩特別，不過佢好聰明，配搭唔同顏色嘅手袖，紅色好搶眼，感覺乾淨利落，高貴之餘帶有型格少女味道感覺，手袖的襯托令打扮更有潮味，配埋名貴珠寶，恰到好處。」

Amanda S.

「裙嘅設計不俗，Amanda S.着上身感覺高貴、典雅，裙嘅顏色配搭特別，兩隻色好有新鮮感，粉藍色望落好柔和舒服，加上蛋糕裙設計，散發一種少女味道，唔需要性感都好靚。」（10分為最高）

Janice Man

「豹紋裙感覺成熟，但着喺年紀輕嘅文詠珊（Janice Man）身上，成個Look好後生好靚，感覺又唔會太花，可惜個髮型和妝完全唔襯條裙，可以話個濃妝唔襯個打扮。」

周秀娜

「一身黑色打扮好穩陣，斜膊設計好靚，外形有一種若隱若現嘅效果，唔使露胸都有誘惑性感，個打扮好好睇，加埋厚底高踭鞋，成身打扮好新潮。」

莊思敏

「莊思敏嘅逼爆Look好刻意將個焦點放喺個胸度，美感欠奉，女性化嘅短裙襯西裝褸，格格不入，而長Boots又未能展露Model高挑美麗嘅身材，妝亦化得太成熟。」

楊洛婷

「有好濃嘅成熟婦人味道，黑色配搭過於Auntie感覺，太過成熟，而上身露肩嘅設計自暴其短，望落手臂好粗。」

鄧紫棋

「佢年紀和身材有優厚條件，但衣着搵唔到自己嘅風格，一身配搭好怪，九唔搭八，紫綠色背心襯紅色Belt（皮帶）完全唔Match，色調唔夾。傘裙暴露Pat大同腳粗，深色打扮會較順眼。」

呂慧儀

「佢着Deep V裙太多，睇到有啲奄悶，望落太暴露太誇，感覺低俗，而且百褶裙嘅設計令下身好肥，裙嘅顏色好似伴娘裙。」

Profile

郭慶彬（Ricky Kwok）加入時裝界8年，以廣告形象指導為主要工作，曾任名模樂基兒和熊黛林的形象指導，並在銅鑼灣開設時裝店，主要售賣日本和英倫時裝。