敖嘉年負傷開工擔心冼灝英

因向陳觀泰拜師而惹冼灝英不滿遭拳擊至爆眉骨的敖嘉年，昨午二時許由女友駕車接載到分域碼頭食飯後便返家，他表示未需到醫院洗傷口，但對冼灝英保釋候查有少少擔心，強調冇嬲對方，傷勢好轉的他還在微博上公告今日將負傷為《巾幗梟雄之義海豪情》宣傳。而身在北京的陳觀泰坦言有如此粗暴的師弟屬師門不幸，對嘉年被打更感心痛：「我同冼灝英算係哎吔師兄弟，一直冇聯絡，佢打嘉年件事都冇搵過我，以前古代就要逐出師門，現今係法治之區，由警察去處理啦！（對冼灝英嘅印象點？）佢太小器。（嘉年話早幾年同冼灝英修好？）我知，冼灝英唔接受，佢係學武之人又係長輩，係唔應該出手。（對你不敬？）我唔講喇！呢個人嘅品德好有問題。」

此外，有報道指馬浚偉早年曾叫敖嘉年「收皮」，昨日馬浚偉出席公開活動時說：「嘉年已經打咗電話畀我話冇講過，佢覺得搞着我好嬲同唔好意思，佢只係話有個前輩嘅說話傷到佢，我要解釋係想還自己清白，我係男人都唔會講收皮，加上舊年先同嘉年合作，以前都冇合作過，事件已交律師處理！」而黎耀祥則說：「我就唔及『排骨』紅啦！希望佢冇事！印象中的冼灝英都唔火爆！」陳美詩稱曾跟冼灝英合作，指他是練武之人，對事件感到奇怪，相信是飲酒累事。