姚佳雯嫌亞視少Job闖模界

有碩士學位的姚佳雯，可說是眾多亞姐中學歷較高的一位，雖然母親做生意，但她自言不懂社交，加上於亞視工作量少，故希望一闖模特兒圈，尋找新天地。

自參選《2008亞洲小姐競選總決賽》後，姚佳雯去年4月正式加入亞視，出生自小康之家的她，原是西安人，但先後於新加坡、瑞士等地留學，更取得酒店管理碩士學位。她從小已很獨立，並不諱言：「好細個父母已經分開，兩歲讀幼稚園時我已經喺學校住，每星期只返屋企一次。媽咪好叻，係女強人，一個人做生意養大我。」

現時佳雯獨自來港發展，她大爆母親起初很贊成，但自從有記者在其寓所樓下等候，母親便開始後悔，但佳雯說：「我就唔係好驚，因為我唔出去蒲，又唔會亂搞男女關係，根本冇嘢畀人影，依家25歲，希望畀多三年時間自己喺呢行發展，唔得先再打算。」問她為何不跟母親學做生意，她說：「我冇佢咁叻，我唔識同人Social，其實Social喺娛樂圈都好重要，不過我真係學得好慢。」

感激何國鉦畀機會

身形不俗的佳雯早前有機會一嘗擔任時裝模特兒，經著名時裝設計師何國鉦（Dorian）介紹下作出新嘗試，她說：「之前Dorian Ho做亞姐形象顧問，我有問佢意見，雖然我唔係模特兒出身，又冇受過訓練，佢都畀機會我，真係好信任我，依家喺亞視嘅工作確實唔多，希望可以做多啲其他嘢試吓，所以一有機會做模特兒，我都會好好把握！」