黎諾懿自尊心重唔吼有錢女

黎諾懿在新劇《讀心神探》中的角色十分現實，是個貪錢仔，但私下卻是大男人一名，自尊心極重，有錢女幾乎免行埋身。

在《讀心神探》中，黎諾懿飾演一個極度貪錢的警察，目標要找有錢女當女友，但原來只是「做戲咁做」，私底下他絕不會着眼金錢，他說：「我怕自己抬唔起頭，我自尊心好重，覺得男人係應該照顧女人，我試過同居，雖然話貧賤夫妻百事哀，但有時兩個人一齊講吓價，老婆同老公講吓呢件嘢抵唔抵買，其實都係一種溝通同情趣，如果老婆真係有錢就冇咗呢個過程嘅樂趣。」

兒時想過食軟飯

其實圈中也不乏娶得有錢太太的正面例子，比如歐陽震華和吳家樂等，但諾懿卻有自知之明：「我學歷唔高，除咗演戲咩都唔識，唔做呢行都唔知做乜，如果老婆有錢係上流社會，我係屋邨長大，各方面都係融入唔到！（好鍾意個女仔呢？）都唔會！我幾大男人o架！女人係要嚟錫同照顧，就算我唔介意，可能會畀人話我貪錢『嫁入豪門』，我唔想有壓力，只想簡簡單單！」問到若然被有錢女追求時會否考慮？諾懿笑言相信對方未必喜歡他：「咁開心佢鍾意我？會唔會撞鬼o架！如果真係畀有錢女追，對我嚟講冇損失，可以考慮，我細個都有諗過食軟飯o架！唔使做又可以照顧阿媽，幾好呀！」