Lynn闖城賀壽吔陳年鮑魚

熊黛林（Lynn）前晚以女主人身份出席郭富城的生日派對，雖陪玩至清晨5時許，但繼續直落攻「城」，在城城寓所溫馨短敍四小時，才急急腳趕往澳門工作。

郭富城和Lynn的戀情近年開始明朗化，昨日是愛郎城城45歲牛一，Lynn前晚與愛犬拿着特別訂製的生日蛋糕「攻城」，兩口子在家切蛋糕後，城城使出調虎離山計，引開大批守候的傳媒，獨自駕車外出，先往灣仔出席生日派對，其後安排另一架車接載Lynn往派對。

Lynn當晚以女主人姿態出席派對，即使捱眼瞓陪玩至天光亦毫無怨言，反而開心到不願離開。城城盡興至清晨5時許走人，並再出蠱惑招，安排Lynn由另一門口離開，再由其好友載返城城的大坑嘉園寓所。一日「攻城」兩次的Lynn與愛郎溫馨短敍四小時，至翌晨十時半才一臉倦容駕車「出城」，急急返家梳洗。逗留半小時，Lynn由保母車接載到上環坐船往澳門出席活動，問到闖城是否盡興？Lynn一臉甜笑，只表示送了蛋糕和禮物給城城，當問到早起身是否夠瞓，她即一臉尷尬，與助手急急入閘離開。

當Lynn離開不久，精力旺盛的城城昨午12時駕車外出，相約友人踢足球，晚上往上環繼續出席生日飯局，同場還有經理人小美及無綫高層何麗全。談及生日願望，城城說：「希望身體健康，世界和平。（Lynn送咗咩禮物？）唔講喇！」

祝愛郎早日成家

至於Lynn在澳門出席Rimowa行李箱品牌旗艦店開幕時表示，與城城吃中菜慶祝。談及城城曾說有陳年鮑魚未食，問到她是否食鮑魚？Lynn說：「唔使講得咁Detail，大家開心就得。（城城希望成家立室？）祝佢早日成家。（即係祝自己？）我嘅願望係拍多啲戲！（你唔幫佢達成願望？）佢嘅願望要靠自己努力。（幾時正式公開關係？）可唔可以唔好問我。（留畀對方答？）自己知道好開心就得，唔使話畀每一個人知。」問到城城是否未求婚，Lynn笑笑口扯開話題。