阿叻撐S.H.E必有後福
陳百祥（阿叻）昨日出席《善心滿載仁愛堂》籌款晚會記者會，重提82年為台慶預演時意外被火燒傷的經歷，並祝福Selina幸運渡過難關，他說：「當時畀火燒真係好、好、好痛，痛到我彈到好遠！原本唔使咁傷，就係我彈走咗啲人都搵唔到，好在戴咗頭盔同着咗牛仔褸，所以淨係傷咗雙手同面。」阿叻還透露當時七個電油彈包圍他爆炸，最後要留醫40日：「原本話要植皮，但我唔想畀人摸籮柚！（當年點樣出錯？）事後狄龍同我講，嗰個唔係特技人，係軍火佬專爆山，當我石咁爆！」問到今次Selina拍爆破戲受傷，他表示不在現場難作評論，但現時爆破技術先進：「要好大錯誤先會搞到咁！不過唔緊要，火燒旺人，最少旺80年，所以S.H.E嚟緊都好旺！好似我咁，依家想冇嘢撈都唔得！祝Selina好運，依家嘅換皮同磨皮技術已經好好。」
阿叻1982年台慶預演被火燒傷，當時要留醫40日。