廖祉甯突然蒲頭九唔搭八

亞姐昨日分別以短褲仔及古裝造型出席試演活動，演出兩套劇集，其中(5)萬嘉麗、(11)吳素嫻及(13)廖祉甯（Barbie姐）有幸與張達明演對手戲，更獲達明大讚，但Barbie姐受訪時言語失控，答非所問。

張達明昨日與候選亞洲小姐試戲，藉此宣傳新劇，達明更被攬足7次，艷福不淺，問到哪位佳麗最好攬時，達明笑說：「梗係老婆啦！」在各位亞姐的表現中，以「Barbie姐」最為「突出」，她不惜赤腳坐地撒嬌，冧得達明暈陀陀甚為受落，其後達明更激讚「Barbie姐」具創意、演戲有感覺，並讚萬嘉麗勝在自然，而吳素嫻的反串演出則被讚是「現代任劍輝」。

大髀瘀傷變「最新紋身」

接受訪問時，「Barbie姐」語無倫次，問到大髀的瘀傷時，她牛頭唔搭馬嘴，自稱最近有點Lucky：「我屋企人覺得我就嚟紅，打算打跛隻腳唔使憂，所以我要去學定跌打！」此言一出嚇窒全場，她鍥而不捨地說：「咁冇理由冇傷走去睇跌打o架嘛！所以我去睇跌打時就學埋！」其後她表示大髀的瘀傷是「最新紋身」，更不理記者提問狂宣傳其「即將推出的公仔」，又吩咐記者「照登就得」，完全答非所問。記者追問她早前缺席宣傳的原因時，「Barbie姐」即寸嘴反問：「乜你哋唔係話我五度缺席咩？你哋講邊次？（咁你對上一次點解缺席？）財多身子弱嘛！」胡言亂語程度令在場公關都忍不住要終止訪問！與「Barbie姐」相比，同樣被讚的吳素嫻及萬嘉麗則更得體有禮。