劉欣宜難忘蘇屋邨氣味
「E Cup Baby」劉欣宜兒時曾由在蘇屋邨居住的外婆照顧，在這兒度過快樂童年。蘇屋邨面臨清拆，舊地重遊的劉欣宜甫踏足屋邨即認真地說：「我真係記得蘇屋邨係呢陣味！」認真搞笑！
雖然人對氣味的記憶能保留最久，但蘇屋邨經過時間洗禮已變得面目全非，例如新建的大牌坊或方便邨民上落的新扶手電梯等，令再次重遊舊地的劉欣宜（Miyoko）都要先睇睇地圖才識帶路，她笑說：「蘇屋話大唔大，話細唔細，以花命名每座大廈，所以好似個大花園咁！我最記得有好多樹都種喺斜坡就係呢度嘅特色，我細個就住喺山上面嘅蘭花樓。」
打鞦韆沖上雲霄
Miyoko表示已有十幾年沒有再到蘇屋邨，至今這兒只剩下山下的幾座及一間舊有的茶餐廳，她說：「以前婆婆成日帶我同阿哥買呢度嘅燒賣同新鮮出爐嘅麵包，雖然冇話係咪最好食，但一定係最有人情味。」除了小食外，她亦非常懷念保持舊有風貌的屋邨後巷、巴士站及隔條馬路的保安道公園：「以前啲人興用『晾衫竹』晾衫，貪佢夠平又晾得夠多衫，依家蘇屋邨後巷仲見到，不過啲衫好容易會跌落嚟。而轉彎大馬路嘅巴士站仍然冇變，我仲記得我以前係搭2號車嚟蘇屋。」
至於保安道公園的遊玩設施已改良不少，但Miyoko最愛的鞦韆仍依舊在公園中，難怪她一見到就像小孩一樣「玩番兩手」，她笑說：「細個打鞦韆覺得同天空好接近，幻想第時搭飛機都可能係呢種感覺，依家玩番諗起都覺得又傻又好笑！」
Miyoko見到最愛的鞦韆仍在公園中，即時「玩番兩手」。
望着一支支晾衫竹，勾起Miyoko不少童年回憶。
為食的Miyoko對着出爐麵包，食指大動！
蘇屋邨面臨清拆，Miyoko把握機會重遊舊地。
Miyoko要先看地圖才識帶路。
Miyoko十分懷念保持舊有風貌的巴士站。
眼見屋邨要改建，Miyoko難免不捨扁嘴！