舒淇膊贏高海寧巨咪

舒淇膊贏高海寧巨咪

女星「事業線」愈勁愈易成為焦點,不過從時裝角度來看,上圍豐滿的女士着衫要好睇,眼光一定要更準,兩位「新一代咪神」高海寧和梁政珏早前大晒導彈身材,卻被「時裝判官」張學潤狠批,反而舒淇穿上「封胸」露膊裙,則以氣質取勝!

舒淇:8分

「舒淇着上呢條金色晚裝裙,顯得好高貴同有氣質,呢種閃片質料仲要金色嘅裙,唔係個個都可以襯得起,但舒淇本身氣質幾好,唔會令人覺得俗氣,佢亦專登將個妝化得唔太濃,令人感覺幾清新!」

高海寧:5分

「高海寧呢條裙十分麻麻哋,搞到佢超大隻,尤其上面太多褶,搞到個胸好大,本身佢個胸已經大,依家Too Much喇!腰間個花花飾物好唔掂,如果改以鑽石心口針反而仲好啲,呢個大花畀新娘戴上頭就啱!其實以佢上圍咁大嘅女仔,最好着啲簡單線條設計嘅裙,好似吊帶裙已經OK。」

梁政珏:6分

「呢條裙設計唔太差,但我唔明點解條裙要拉到咁低,好似就嚟跌咁,同埋條裙好似個Size可以大番少少,依家過分性感喇!露咗太多胸,如果真係要露胸,最好都加少少飾物,令成個感覺平衡啲!」

林欣彤:6分

「林欣彤着呢條粉紅色連身裙幾Sharp,好襯佢呢個年紀,有青春氣息,不過如果條裙可以再短多少少,咁會顯得再青春啲,配合佢個年紀。其實佢本身上圍都算豐滿,唔係太適合着啲太繁複圖案嘅衫,反而簡簡單單就好襯佢。」

章子怡:6分

「條裙設計幾特別,顏色幾靚,但章子怡本身唔高,條裙拖得太長喇!前幅個開衩位有啲尷尬,應該要修改吓個長度,個衩位起碼要到大腿先好睇,而且佢對黑色高跟鞋感覺太重,換對淺色高跟鞋會好睇好多。」

鍾麗緹:8分

「鍾麗緹一向畀人熱情鬼妹仔形象,成身蜜糖肌膚,性感得嚟又健康,呢條橙色晚裝裙好襯佢,有一種熱帶風情,加上本身條裙設計有特色,佩戴埋一條閃石頸鏈同耳環,成個感覺好正,保持到佢昔日喺大銀幕上嘅性感形象。」

鍾嘉欣:7分

「今年流行喱士衣飾,嘉欣呢條連身裙都着得出個時代感,幾有型,如果佢轉為直髮髮型就更好,會青春好多,依家就有少少女性化,不過都見到佢着衫有好大進步o架喇!」

袁彌明:7分

「佢嘅身材好均勻,着呢款Cocktail裙都好好睇,成條裙嘅設計簡單得嚟又夠特色,單肩設計係成條裙嘅精髓,因為佢膊頭夠靚,所以我覺得幾啱佢,如果太大隻嘅女仔就唔適合着!」

Profile

著名時裝設計師兼形象指導張學潤(Nelson),在娛樂圈打滾近二十年,見盡女星扮靚百態,對時裝審美眼光獨到,評衫作風敢言大膽,行內人愛稱呼他為「時裝判官」。

專案組

舒淇

高海寧

梁政珏

林欣彤

章子怡

鍾麗緹

鍾嘉欣

袁彌明